ޝަރުތުތައް ފުރިހަމަނުކޮށް ރާއްޖެ ގެންނަ ދުންފަތުގެ ބާވަތްތައް ނައްތާލަން ހިނގާ ހަރަދު، އެ ތަކެތި ގެނައި މީހުން ދައްކަންޖެހޭ ގޮތަށް ގަވާއިދު ބަދަލުކޮށްފި އެވެ.
ދުންފަތުގެ ބާވަތްތައް ޕެކެޓުކޮށް ލޭބަލް ޖެހުމާ ބެހޭ ގަވައިދަށް އިސްލާހު ގެނެސްފައި ވަނީ މިއަދު އެވެ.
އެ އިސްލާހުގައި ވަނީ، ދުންފަތުގެ ބާވަތްތައް ރާއްޖެއަށް އެތެރެކުރާ މަރުހަލާގައި އެ ގަވާއިދު ތަންފީޒުކުރުމުގެ ގޮތުން ގަވާއިދާ ހިލާފުވާ ފަރާތްތައް ޖޫރިމަނާ ކުރުމާއި ޖޫރިމަނާ ފައިސާ ނުދައްކާ ފަރާތްތަކުގެ އަތުން ފައިސާ ހޯދުމުގެ މަސައްކަތާއި ގަވާއިދާ ހިލާފަށް ހުންނަ ތަކެތި ނައްތާލުން ފަދަ ކަންކަން ކުރާނީ ކަސްޓަމްސް އިން ކަމަށެވެ.
އެގޮތުން، ދުންފަތުގެ ބާވަތްތައް ރާއްޖެއަށް އެތެރެކުރާ މަރުހަލާ ފިޔަވައި މި ގަވާއިދު ތަންފީޒުކުރުމުގެ ގޮތުން ގަވާއިދާ ހިލާފުވާ ފަރާތްތައް ޖޫރިމަނާކުރުމާއި ޖޫރިމަނާ ފައިސާ ނުދައްކާ ފަރާތްތަކުގެ އަތުން ފައިސާ ހޯދުމުގެ މަސައްކަތާއި ގަވާއިދާ ހިލާފަށް ހުންނަ ތަކެތި ނައްތާލުން ފަދަ ކަންކަން ކުރާނީ އެޗްޕީއޭއިން ކަމަށް އެ އިސްލާހުގައިވެ އެވެ.
ޕޯސްޓު ނުވަތަ ކޮރިއަ މެދުވެރިކޮށް ނުވަތަ އޯޑަރުކޮށްގެން ވިޔަފާރީގެ ބޭނުން ފިޔަވައި އެހެނިހެން ހާލަތްތަކުގައ،ި ދުންފަތުގެ ބާވަތްތައް ރާއްޖެއަށް އެތެރެކޮށްފި ނަމަ އެ ތަކެތި ރާއްޖެ އެތެރެކުރި ފަރާތް ޖޫރިމަނާކުރުމަށްފަހު ކަސްޓަމްސްގެ އާންމު ގަވާއިދާ އެއްގޮތަށް އެ ތަކެތި ކަސްޓަމްސް އިން ނައްތާލަންވާނެ ކަމަށްވެސް ގަވައިދުގައި ބުނެފައިވެ އެވެ.
މީގެ އިތުރުން، ހިފަހައްޓާ ތަކެތި ކަސްޓަމްސްގެ ކޮންޓްރޯލް ދަށުގައި ހުންނައިރު ހިނގާ ހަރަދު ވެސް އެ ތަކެތި ރާއްޖެ ގެނައި ފަރާތުން ދައްކަންޖެހޭނެ ކަމަށް ބުނެފައިވެ އެވެ.
