ބިދޭސީންގެ މައްސަލަތައް ހައްލު ކުރުމަށް ސަރުކާރުން ކުރިއަށްގެންދާ ”އޮޕަރޭޝަން ކުރަނގި“ ފުވައްމުލައް ސިޓީގައި ފެށުމަށް ތައްޔާރުވެއްޖެ އެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަތައް ހައްލުކުރުމަށް ކުރިއަށްގެންދާ އޮޕަރޭޝަނަކީ ހޯމް މިންސްޓްރީއިން ރަށްރަށުގެ ކައުންސިލްތަކާއި ގުޅިގެން ކުރިއަށްގެންދާ މަސައްކަތެކެވެ.
މި އޮޕަރޭޝަން ފުވައްމުލައް ސިޓީގައި ކުރިއަށްގެންދަން ނިންމާފައި ވަނީ މި މަހުގެ 5 އިން 20 ގެ ނިޔަލަށެވެ.
ފުވައްމުލަކު ސިޓީ ކައުންސިލުން ބުނީ، އެ ސިޓީގައި ދިރިއުޅޭ ހުރިހާ ބިދޭސީ މަސައްކަތްތެރިންގެ ބަޔޯމެޓްރިކްސް ނަގައި އެމީހުންގެ މަޢުލޫމާތު އަދާހަމަކުރުމުގެ މަސައްކަތް އެ މުއްދަތުގައި ކުރައަށްދާނެ ކަމަށެވެ.
މި އަހަރުގެ ޖޫން މަހުގެ ތިންވަނަ ދުވަހު ފެށި ކުރަނގި އޮޕަރޭޝަންގެ ދަށުން މިހާތަނަށް 8385 ބިދޭސީއެއްގެ ބަޔޯމެޓްރިކް ޑޭޓާ ވަނީ އެއްކޮށްފަ އެވެ. އަދި 96 ރަށެއްގައި މި މަސައްކަތް ފަށައި 21 ރަށެއްގައި އެމަސައްކަތް ނިންމާފައިވާކަން ފާހަގަކޮށްލެވެ އެވެ.
މި އޮޕަރޭޝަނަކީ ދިވެހިރާއްޖޭގައި ގަވާއިދާ ޚިލާފަށް ދިރިއުޅެމުންދާ ބިދޭސީ މަސައްކަތްތެރިންގެ މައްސަލައަށް ދާއިމީ ހައްލެއް ހޯދުމަށްޓަކައި ހޯމް މިނިސްޓްރީއިން ކުރިޔަށް ގެންދާ އޮޕަރޭޝަނެކެވެ.
