ޕާކިސްތާނަށް ރާއްޖެއިން ކަނޑައަޅާފައިވާ ސަފީރު މުހައްމަދު ތޯހާ، އަފްޣާނިސްތާނުން ޕާކިސްތާނަށް ކަނޑައަޅާފައިވާ ވަގުތީ ސަފީރު ސަރްދާރް އަހްމަދު ޝަކީބާއި ބައްދަލުކުރި މައްސަލައިގައި އޭނާގެ މައްޗަށް ފިޔަވަޅު އަޅާނެ ކަމަށް ދިވެހި ސަރުކާރުން ބުނެފި އެވެ.
ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ ރާއްޖެއިން ޕާކިސްތާނަށް ކަނޑައަޅާފައި ހުންނަވާ ސަފީރު، އަފްޣާނިސްތާނުގެ ފަރާތުން ޕާކިސްތާނުގައި ހުންނަވާ މަންދޫބާ އެކު ބޭއްވި ބައްދަލުވުމަކީ ދިވެހި ސަރުކާރުގެ ހުއްދައާއެކު ކުރިއަށް ގެންގޮސްފައިވާ ބައްދަލުވުމެއް ނޫން ކަމަށެވެ. އަދި މި ކަމާއި ގުޅިގެން ދިވެހި ސަރުކާރުގެ ފަރާތުން އަޅަންޖެހޭ ފިޔަވަޅު އަޅާފައިވާ ކަމަށް ސަރުކާރުން ބުންޏެވެ.
ރާއްޖޭން ގައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއްގައި އަބަދުވެސް ބަލަނީ އ.ދ. އިން ކަނޑައަޅާފައިވާ މިންގަޑުތަކާއި އުސޫލުތަކަށް ކަމަށް ބުނެފައި ވެއެވެ. އަދި މި އުސޫލުތަކާއި އެއްގޮތްވާ ގޮތުގެ މަތީން، އ.ދ. ގައި އަފްޣާނިސްތާނު ތަމްސީލުކުރާ ފަރާތަކީ އަފްޣާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ބަލައިގަންނަ ފަރާތް ކަމަށްވެސް ފޮރިން މިނިސްޓްރީގެ ބަޔާނުގައި ވެއެވެ.
އަފްޣާނިސްތާނުގެ ނޫހެއް ކަމުގައިވާ އާރިއާނާ ނިއުސް އިން މީގެ ދެ ދުވަސް ކުރިން ރިޕޯޓްކޮށްފައިވާ ގޮތުގައި ތޯހާ، ސަރްދާރާއި ބައްދަލުކުރައްވާފައިވަނީ ނިމިދިޔަ ހަފްތާގެ ފަހުކޮޅުގަ އެވެ. އެ ބައްދަލުވުމުގައި އޭނާ ވަނީ އަފްޣާނިސްތާން މެދުވެރިކޮށް ރާއްޖެ އާއި ސެންޓްރަލް އޭޝިއާގެ ގައުމުތަކާ ދެމެދު ވިޔަފާރީގެ ގުޅުން ބޭއްވޭނެ ގޮތްތަކާއި ގުޅޭގޮތުން މަޝްވަރާ ކުރައްވާފަ އެވެ.
ސަރްދާރު ވިދާޅުވީ އަފްޣާނިސްތާނުން ހުރިހާ ގައުމަކާއެކު ބިނާކުރަނިވި ގުޅުންތަކެއް ގާއިމްކޮށް، އިގްތިސާދީ ސިޔާސަތުތަކުގެ ތެރެއިން، އަފްޣާނިސްތާން ސަރަހައްދީ ގުޅުންތަކުގެ މަރުކަޒަކަށް ބަދަލުކުރުމަށް މަސައްކަތް ކުރަމުންދާ ކަމަށެވެ.
