އަމިއްލަ އިންޝުއަރެންސް ގެންގުޅޭ ފަރާތްތަކަށް އެ ކުންފުނީގެ ހިދުމަތް ފޯރުކޮށްދޭ ގޮތަށް ބަދަލުތަކެއް ގެންނަ ނަމަވެސް، ފުލުހުންނާއި އެމްއެންޑީއެފްގެ އޮފިސަރުންނަށް މި ބަދަލުތަކުން އިސްތިސްނާވެ، ކުރިއެކޭ އެއްފަދައިން އާސަންދައިގެ ހިދުމަތް ލިބެމުންދާނެ ކަމަށް އާސަންދަ ކުންފުނިން ބުނެފި އެވެ.
އާސަންދައިން ބުނީ އިއްޔެއިން ފެށިގެން އަމަލުކުރަން ފަށާފައިވާ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންއެސްޕާ)ގެ ލަފާގެ ދަށުން ބަދަލުތަކެއް ގެނެސްފައިވާ ކަމަށެވެ.
މި ބަދަލުތަކާއެކު އާސަންދަ ކަވަރޭޖް މިހާރު ލިބެނީ ބަލިމީހާ ގެންގުޅޭ އެއްވެސް އަމިއްލަ އިންޝުއަރެންސަކުން ފުރަތަމަ ޗާޖު ކުރުމަށް ފަހު އެވެ. މީގެކުރިން އެހެން ގޮތްގޮތުން ސިއްހީ ބޭސްފަރުވާ އިންޝިއުރެންސް ލިބޭ ފަރާތްތަކަށްވެސް އާސަންދަ ކަވަރޭޖް ލިބެ އެވެ.
އެ ކުންފުނިން ބުނީ ޕޮލިސް އަދި އެމްއެންޑީއެފް އިންޝުއަރެންސް ސްކީމްތަކަކީ ޕްރައިވެޓް އިންޝުއަރެންސް ސްކީމެއް ކަމަށް ނުބެލެވޭ ކަމަށާއި، އެގޮތުން، އާސަންދަ ކަވަރޭޖް އެ ދެ މުއައްސަސާގެ މުވައްޒަފުންނަށް ލިބެމުންދާނެ ކަމަށެވެ.
އާސަންދައިން އިތުރަށް ބުނީ މިހާރު ކުރާ ގޮތަށް އެމްއެންޑީއެފް އާއި ޕޮލިހުން އިން-ޕޭޝަންޓް ފަރުވާތަކަށް ހިދުމަތް ދެމުން ގެންދިއުމަށް ހިދުމަތްދޭ ފަރާތްތަކަށް އަންގާފައިވާ ކަމަށެވެ.
އަމިއްލަ އިންޝިއުރެންސް ލިބިފައިވާ ފަރާތްތަކަށް ވެސް އާސަންދަ ކަވަރޭޖް ލިބޭނީ އެމީހުންގެ ޕްރައިވެޓް އިންޝުއަރެންސް ކަވަރޭޖް ލިމިޓަށް ހަމަވެފައިވާނަމަ، އަދި އެ ހިދުމަތް އާސަންދައިގެ ދަށުން ހިމެނޭ ގޮތަށެވެ.
ކަވަރޭޖް ލިމިޓަށް ހަމަނުޖެހިއްޖެނަމަ އާސަންދަ ޕޯޓަލް އަދި ބޭސް ސިޓީއަށް ވިނަވި ޕޯޓަލް ބޭނުން ނުކުރެވޭނެ އެވެ.
ފިނޭންސް މިނިސްޓްރީގެ އެންމެ ފަހުގެ ތަފާސް ހިސާބުތައް ދައްކާ ގޮތުން މިއަހަރުގެ ޖޫން މަހުގެ ނިޔަލަށް އާސަންދައިގެ ހިދުމަތަށް 918 މިލިއަން ރުފިޔާ ހަރަދުކޮށްފައިވެ އެވެ. މިއީ ބަޖެޓުން ދޫކުރާ 1.9 ބިލިއަން ރުފިޔާގެ ގާތްގަނޑަކަށް 50 އިންސައްތަ އެވެ.
