ޕްރައިވެޓް އިންޝުއަރެންސް ކުންފުނިތަކުން ކޭޝްލެސް ޕޭމެންޓް ހުއްޓާލުމުން ކަމުގައި ވިޔަސް، އަމިއްލަ އިންޝުއަރެންސް ޕޮލިސީން ކަވަރޭޖް ނުލިބޭ ހާލަތްތަކުގައި އާސަންދައިގެ ކަވަރޭޖް ލިބޭނެކަމަށް ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ބުނެފި އެވެ.
އެންސްޕާއިން މިއަދު ނެރުނު އިއުލާނުގައި ވަނީ އެ އޭޖެންސީން މިދިޔަ މަހުގެ 31 ވަނަ ދުވަހު ނެރުނު އިއުލާނަކާ ގުޅިގެން ހަގީގަތާ ހިލާފު މައުލޫމާތު ފަތުރަމުންދާކަމަށް ބުނެފަ އެވެ.
އެންސްޕާއިން އޮކްޓޫބަރު 31 ގައި ނެރުނު އިއުލާނުގައި ބުނެފައިވަނީ ސިއްހީ ހިދުމަތްދޭ އަމިއްލަ ތަންތަނުން ”އައުޓް-ޕޭޝަންޓް“ ގެ ހިދުމަތްތަކަށް ބިލު ކުރުމުގައި ޕްރައިވެޓް އިންޝުއަރެންސް އަށް އިސްކަން ދިނުމަށް ނިންމާފައިވާ ކަމަށެވެ.
އެ އޭޖެންސީން މިއަދު ނެރުނު އިއުލާނުގައި ބުނެފައިވަނީ އެއްވެސް ފަރާތަކަށް ޕްރައިވެޓް އިންޝުއަރެންސްގެ ކަވަރޭޖް ނުވަތަ ހިދުމަތް ނުލިބޭ ހާލަތެއްގައިނަމަ އެ ފަރާތަކަށް އާސަންދަ ސްކީމުން މިހާރުވެސް ހިދުމަތް ލިބެމުންދާ ގޮތަށް ބޭސްފަރުވާގެ ހިދުމަތް ލިބިގެންދާނެ ކަމަށެވެ. އަދި މިކަން ކުރިން ނެރުނު އިއުލާނުގައިވެސް ބަޔާންކޮށްފައިވާނެކަމަށް އެންސްޕާއިން ބުނެ އެވެ.
އަމިއްލަ އިންޝުއަރެންސް ކުންފުނިތަކުން ކޭޝްލެސް ޕޭމަންޓް ހުއްޓާލުމުގެ ސަބަބުން ކަމުގައި ވިޔަސް، އަމިއްލަ އިންޝުއަރެންސް ޕޮލިސީން ކަވަރޭޖް ނުލިބި، އަމިއްލަ ޖީބުން ފައިސާ ދައްކަން ޖެހޭ ހާލަތެއްގައި، އާސަންދައިގެ ކަވަރޭޖް ކުރިއެކޭވެސް އެއްގޮތަށް ލިބިގެންދާނެ.
އެންސްޕާއިން ވަނީ މިފަދަ ދަނޑިވަޅެއްގައި ކަމުގެ ހަގީގަތް އޮޅޭ ގޮތަށް އެކި ފަރާތްތަކުން ދޮގު މައުލޫމާތު ހާމަކުރަމުން ދާތީވެ އެކަމާ ކަންބޮޑުވުން ފާޅުކޮށްފަ އެވެ. އަދި މިކަމާ ގުޅުން ހުރި ސައްހަ މައުލޫމާތު ސާފު ކުރުމަށްވެސް އެންސްޕާއިން ވަނީ އިލްތިމާސް ކޮށްފަ އެވެ. އެގޮތުން އިތުރު މައުލޫމާތު ހޯދުމަށް އާސަންދައިގެ ހޮޓްލައިން 1400 އަށް ގުޅޭނެކަމަށްވެސް އެންސްޕާއިން ބުނެ އެވެ.
