ވަގަށް ނަގާފައިވާ 67 ކާޓަން ސިނގިރޭޓާއެކު މީހަކު ހައްޔަރުކޮށްފި އެވެ.
ފުލުހުން މިހެން ބުނެފައި ވަނީ މިއަދު މީޑިއާތަކަށް ފޮނުވި މެސެޖެއްގަ އެވެ.
ފުލުހުން ބުނެފައި ވަނީ، އިއްޔެ ފަތިހު 5:40 ހާއިރު ފުލުހުން ޕެޓްރޯލް ކުރަމުން ދިޔައިރު އޮލިމްޕަސް ކައިރިން ދިޔަ މީހަކާމެދު ތުހުމަތު ކުރެވިގެން ހުއްޓުވައި, އޭނާ ގެންގުޅުނު ދަބަސްތަކަކާއި ކޮތަޅުތަކެއް ބަލައި ފާސްކުރިއިރު އެ ސިނގިރޭޓު ކާޓަންތައް ފެނުނު ކަމަށެވެ.
އެތަކެއްޗަކީ އޯޝަން ނޮޓިކަލް ޕްރައިވެޓް ލިމިޑެޓުން އޭނާ ވަގަށް ނަގާފައިވާ ތަކެތިކަން މިހާތަނަށް ބެލިބެލުމުން އެނގިފައިވާ ކަމަށްވެސް ފުލުހުން ބުނެފައިވެ އެވެ.
މި މައްސަލައާ ގުޅިގެން ހައްޔަރުކޮށްފައި ވަނީ ށ. ފޭދޫ, ހިރުނުމާގެ, މުހައްމަދު ލުޖައިން (24އ) އެވެ.
ފުލުހުން ބުނީ އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 5 ދުވަހުގެ މުއްދަތެއް ބަންދުކުރުމަށް އަމުރު ކޮށްފައިވާ ކަމަށެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
