ބަންގްލަދޭޝް އިން މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީ-ޓު-އެއާ ކާގޯ ހިދުމަތް ހޯދަން ފަށައިފި އެވެ.
އިންޑިޔާގެ ނޫސް، އިންޑިއަން އެކްސްޕްރެސް އިން މިންޓްގައި ޝާއިއުކޮށްފައި އޮތް ހަބަރަކަށް ރިއާޔަތްކޮށްފައި ބުނީ ބަންގްލަދޭޝްގެ ޖީޑީޕީގެ 13 އިންސައްތަ ހިއްސާކުރަނީ އެގައުމުގެ އަންނައުނު އެކްސްޕޯޓް ވިޔަފާރިއަށް ކަމަށެވެ. އަންނައުނު އެކްސްްޕޯޓް ކުރުމަށް ބަންގްލަދޭޝް އިން މިހާތަނަށް ބޭނުންކުރަމުން ދިޔައީ އިންޑިޔާގެ ޕޯޓްތަކެވެ. ނަމަވެސް އިންޑިޔާގެ ޕޯޓުތަކުން ހިދުމަތް ހޯދުމުގެ ބަދަލުގައި މި ހިދުމަތް ރާއްޖެއިން ހޯދަން ފެށުމުން އިންޑިޔާއަށް ބޮޑު ގެއްލުމެއް ލިބޭނެ ކަމަށް އެ ނޫހުން ރިޕޯޓްކޮށްފައި ވެއެވެ. އަދި އިންޑިޔާގެ ކަމާއި ގުޅޭ އިދާރާތަކުން މިކަން ބަލަމުންދާ ކަމަށްވެސް ރިޕޯޓްކޮށްފައި ވެއެވެ.
އިންޑިޔަން އެކްސްޕްރެސް އިން ރިޕޯޓްކުރި ގޮތުގައި ބަންގްލަދޭޝް އިން މި ނިންމުން ނިންމާފައިވަނީ ބަންގްލަދޭޝްއިން ބޭރުވާން މަޖުބޫރުވެވަޑައިގަތް ކުރީގެ ބޮޑުވަޒީރު ޝެއިހް ހަސީނާއަށް އިންޑިޔާއިން ހިމާޔަތް ދިނުމާއި ގުޅިގެން ކަމަށެވެ. ނަމަވެސް ބަންގްލަދޭޝްގެ މި ނިންމުމާއި ގުޅޭގޮތުން އެގައުމުގެ ސަރުކާރުން އަދި އެއްވެސް އެއްޗެއް ބުނެފައި ނުވެ އެވެ.
ނަމަވެސް މި ސިނާއަތުގެ ތަޖުރިބާކާރުން ބުނީ ބަންގްލަދޭޝްއިން މި ފިޔަވަޅު އެޅީ އިންޑިޔާގެ ޕޯޓްތަކުން ސާމާނު ބޭރުކުރުމަށް ގިނަ ދުވަސް ނަގާތީ އެކަމުން ލިބޭ ގެއްލުން ކުޑަކުރުމަށެވެ. ބަންގްލަދޭޝްގެ އެކްސްޕޯޓްގެ 80 އިންސައްތައަކީ އަންނައުނު އުފައްދާ އިންޑަސްޓްރީ އެވެ. މި އިންޑަސްޓްރީ އިން ހުޅަނގުގެ ބޮޑެތި ބްރޭންޑްތައް ކަމަށްވާ އެޗް އެންޑް އެމް ފަދަ ލޭބަލްތަކަަށް އަންނައުނު ސަޕްލައިކޮށްދެ އެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިއަހަރު މާޗް މަހުގެ ތެރޭގައި ވަނީ ސީ-ޓު-އެއާ ކާގޯ ޓްރާންސްޝިޕްމެންޓް ހިދުމަތްް ފަށާފަ އެވެ. މިހާތަނަށް 7 އެއާލައިނަކުން ވަނީ މި ހިދުމަތުގެ ބޭނުން ހިފާފަ އެވެ. އޭގެ ތެރޭގައި ގަތަރު އެއާވޭސް، އެމިރޭޓްސް، ޓާކިޝް އެއާލައިންސް، ނީއޯސް އެއާލައިންސް، އެއިރޯފްލޮޓް، އިއްތިހާދު އަދި ގަލްފް އެއާ ހިމެނެ އެވެ.
ރާއްޖެ - ބަންގްލަދޭޝް އިންޑިއާ އެމްއޭސީއެލް މޯލްޑިވްސް ޕޯޓްސް ލިމިޓެޑް (އެމްޕީއެލް)
