ސައިކަލު ހުއްޓުވަން އުޅުމުން ފުލުސް މީހާ ގައިގައި ސައިކަލުން ޖެއްސި މީހަކު ހައްޔަރުކޮށްފި އެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައި ވަނީ، ރޭ 22:42 ހާއިރު ހުޅުމާލޭ ރީތިގަސް މަގުން ބާރު ސްޕީޑްގައި ދުއްވި ސައިކަލެއް މަޑުކުރަން ފުލުހަކު ބުނުމުން މަޑުނުކޮށް ދާން މަސައްކަތް ކުރި ކަމަށެވެ.
ފުލުހުން ބުނީ، އެ ސައިކަލު ހުއްޓުވަން އުޅުމުން އެ ފުލުސް މީހާ ގައިގައި ސައިކަލު ޖައްސައި ފުލުހުންގެ ދައުރު އަދާކުރުމަށް ހުރަސް އަޅައި ފިލަން މަސައްކަތް ކުރުމުން އޭނާ ހައްޔަރުކޮށްފައިވާ ކަމަށެވެ.
މި މައްސަލައާ ގުޅިގެން ހައްޔަރުކޮށްފައިވަނީ ހދ. ކުޅުދުއްފުށި، މިލްކުރާގެ، އަހުމަދު ޝަހީން ޝާހިދު (18އ) އެވެ.
އަދި ފުލުހުން ބުނީ، ސައިކްލު ދުއްވަން އިންމީހާގެ އަތުގައި ލައިސެންސު ނެތް ކަމަށެވެ.
ފުލުހުން ބުނީ، އެ ފުލުސް މީހާއަށް ހޮސްޕިޓަލްގައި ފަރުވާދިނުމަށްފަހު ދޫކޮށްލާފައިވާ ކަމަށާއި، މި މައްސަލަ ފުލުހުން ގެންދަނީ ތަހުގީގު ކުރަމުން ކަމަށެވެ.
