’ދިވެހިންގެ އުފެއްދުންތެރިކަމުގެ މައުރަޒު 2025‘ ގެ ވެބްސައިޓް އިފްތިތާޙްކޮށްފި އެވެ.
މި ވެބްސައިޓް ލޯންޗްކޮށްދެއްވީ އިކޮނޮމިކް މިނިސްޓަރ މުހައްމަދު ސައީދު އެވެ. އަދި މި މައުރަޒު ބާއްވަން ހަމަޖެހިފައި ވަނީ، އަންނަ އަހަރުގެ މެއި މަހުގެ ތެރޭގަ އެވެ.
މި ވެބްސައިޓް މެދުވެރިކޮށް މައުރަޒުގައި ބައިވެރިވުމުގެ ފުރުޞަތު މިހާރު ވަނީ ހުޅުވާލާފަ އެވެ. އަދި މައުރަޒާ ގުޅޭ މުހިންމު ގިނަ މައުލޫމާތުތަކެއް ވެބްސައިޓުން ލިބެން ހުންނާނެ އެވެ.
އެގޮތުން، މި މައުރަޒަކީ ރާއްޖޭގެ އުފެއްދުންތެރިކަން އިތުރުކުރުމާއި ވިޔަފާރި ފުޅާކުރުމުގެ މަގްސަދުގައި އުފެއްދުންތެރި ކަމަށް އަމާޒުކޮށްގެން ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ އިސްނެންގެވުމާއި އިރުޝާދުގެ ދަށުން ބާއްވާ މައުރަޒެކެވެ.
އިކޮނޮމިކް މިނިސްޓްރީ އިން ބުނީ، މިއީ ދިވެހިންގެ އުފެއްދުންތެރިކަން މުޅި ދުނިޔެއަށް ދައްކާލުމަށް ލިބޭ ރަނގަޅު ފުރުޞަތެއް ކަމަށެވެ.
