ގައުމު ތަރައްގީކޮށް ކުރިއެރުވުމުގައި އެކި ހިޔާލުތަކާއި، އެކި ފިކުރުތަކާއެކީގައި މަޝްވަރާކޮށްގެން ނޫނީ ބޭނުންވާ އެންމެ ރަނގަޅު މިސްރާބަކަށް ނުދާނެ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެ އެވެ.
ވަޒީރު އާދަމް ޝަރީފް މިހެން ވިދާޅުވީ އިއްޔެ ރޭ ކޮޅުމަޑުލުގެ ވެރިރަށް ވޭމަންޑޫގައި ބޭއްވުނު ކޮޅުމަޑުލު އިސްރަށްވެހިންގެ މަހާސިންތާ 2024 ހުޅުވައިދެއްވުމުގެ ރަސްމިއްޔާތުގައި ދެއްކެވި ވާހަކަގަ އެވެ.
މި ރަސްމިއްޔާތުގައި ވާހަކަ ދައްކަވަމުން، ވަޒީރު ވިދާޅުވީ މަލްޓިޕާޓީ ޑިމޮކްރަސީގައި، ތަފާތު ފިކުރުގެ އެކި ވިސްނުމުގެ ބޭފުޅުންގެ ހިޔާލާއި މަޝްވަރާއަކީ ބޭނުންތެރި އެއްޗެއް ކަމަށެވެ.
”އެންމެފަހުން ގައުމީ ޔުނިވަރސިޓީން ހެދި ދިރާސާއިން ވެސް ފެނިގެން ދިޔައީ ލާމަރުކަޒީ ނިޒާމު ދިވެހި ރައްޔިތުން ބަލައިގެންފި ކަން. ދިވެހިރާއްޖޭގެ ވެރިކަން ލާމަރުކަޒީ ނިޒާމާ އެއް ގޮތަށް އޮންނަން ޖެހޭ ކަން. އެހެންވީމާ ރާއްޖޭގައި އޮންނާނީ ލާމަރުކަޒީ ނިޒާމު“ ވަޒީރު ވިދާޅުވި އެވެ.
މީގެ އިތުރުން، ވަޒީރު އާދަމް ޝަރީފް ވިދާޅުވީ ލާމަރުކަޒީ ނިޒާމުގައި ޚިދުމަތް ފޯރުކޮށްދިނުމަށް ރައްޔިތުންގެ ތެރެއިން ބަސްބުނަން ތިބި ބަޔަކީ ކައުންސިލަރުން ކަމަށެވެ. އަދި އެ މަޤާމު ހޯދުމަށް ކައުންސިލަރުން މަސައްކަތްކުރަން ޖެހޭ ކަމަށް ވެސް ވިދާޅުވި އެވެ.
މި މަހާސިންތާގައި ކޮޅުމަޑުލުގެ ރަށްރަށުގެ ކައުންސިލްތަކުގެ ރައީސުންނާއި، ސެކްރެޓަރީ ޖެނެރަލުންނާއި، އަތޮޅުގެ ކަންކަން ބަލަހައްޓަވާ ދައުލަތުގެ މުއައްސަސާތަކުގެ ވެރިންނާއި، ޚާއްޞަ މަންދޫބުންނާއެކު ގާތްގަނޑަކަށް 40 އެއްހާ ބޭފުޅުން ބައިވެރިވެވަޑައިގަންނަވަ އެވެ.
މިނިސްޓަރު އާދަމް ޝަރީފް އުމަރު މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް ތ. ވޭމަންޑޫ
