ވެރިކަން ކުރާ މައި ޕާޓީ، ޕްރޮގްރެސިވް ޕާޓީ އޮފް މޯލްޑިވްސް (ޕީއެންސީ) ގެ ދާއިރާތަކުގެ މަޤާމުތަކުގެ އިންތިޚާބު އަނެއްކާވެސް ފަސްކޮށްފިއެވެ.
ޕީއެންސީން މިއަދު ނެރުނު އިޢުލާނުގައި ބަޔާންކޮށްފައިވާ ގޮތުގައި، މި މަހުގެ 9 ވަނަ ދުވަހު ބޭއްވުމަށް ހަމަޖެހިފައިވާ އެ ޕާޓީގެ ދާއިރާތަކުގެ މަޤާމުތަކުގެ އިންތިޚާބު މިހާރު ވަނީ މި މަހުގެ 23 ވާ ހޮނިހިރު ދުވަހަށް ފަސްކޮށްފައެވެ.
މި އިންތިޚާބު ފަސްކުރަން ޖެހުނު ސަބަބެއްގެ ގޮތުގައި ޕީއެންސީން ފާހަގަކޮށްފައިވަނީ، ޖުމްހޫރީ ދުވަހާ ގުޅިގެން މި މަހުގެ 10 ވަނަ ދުވަސް ރަސްމީ ބަންދު ދުވަހެއްގެ ގޮތުގައި ސަރުކާރުން ހަމަޖެއްސުމާ ގުޅިގެން، އެ ހަފްތާ ބަންދުގައި ގިނަ ބަޔަކު ރަށުން ބޭރަށް ދަތުރުކުރުމަށް ހަމަޖެހިފައިވާތީ، މި މަހުގެ 9 ވަނަ ދުވަހު ވޯޓުލުމުގައި މެންބަރުންނަށް ދަތިތަކެއް ކުރިމަތިވެދާނެތީއެވެ. މި ނިންމުން ނިންމާފައިވަނީ ކެންޑިޑޭޓުންނާއި މެންބަރުންގެ އެދުމުގެ މަތިންކަމަށްވެސް ޕީއެންސީން ބުނެފައިވެއެވެ.
މި އިންތިޚާބު އެންމެ ފުރަތަމަ ބޭއްވުމަށް ނިންމާފައިވަނީ މިދިޔަ އޮކްޓޯބަރު މަހުގެ 19 ވަނަ ދުވަހުއެވެ. ނަމަވެސް، ފަހުން އެ ތާރީޚު ވަނީ މި މަހުގެ 9 ވަނަ ދުވަހަށް ބަދަލުކޮށްފައެވެ. އަދި މިހާރު އަނެއްކާވެސް އިތުރު ދެ ހަފްތާއަށް ފަސްކޮށްފައިވާކަން ފާހަގަކުރެވެއެވެ.
ޕީއެންސީން އިތުރަށް ހާމަކޮށްފައިވާ ގޮތުގައި، އިންތިޚާބުގެ ތާރީޚު ބަދަލުވުމާ ގުޅިގެން، އިންތިޚާބު ބާއްވަންޖެހޭ ދާއިރާތަކާއި ރަށްރަށް، ކެންޑިޑޭޓުންގެ ނަންތައް އަދި ވޯޓުލެވޭ މީހުންގެ ލިސްޓު މި މަހުގެ 10 ވަނަ ދުވަހު އާންމުކުރާނެއެވެ.
