ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ ޓްރާންސްފޯމަރުން ވައްކަން ކުރަން އުޅުނު ކަމުގެ ތުހުމަތުގައި ހައްޔަރުކުރެވުނު މީހެއްގެ ބަންދު މުއްދަތު 30 ދުވަހަށް އިތުރުކޮށްފި އެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވާ ގޮތުގައި، މި މައްސަލައާ ގުޅިގެން ހައްޔަރުކުރެވުނު މީހާގެ ބަންދު މުއްދަތު 30 ދުވަހަށް އިތުރުކުރުމަށް ކޯޓުން އިއްޔެ އަމުރުކޮށްފައިވެ އެވެ. މި މައްސަލައިގެ ތުހުމަތުގައި ހައްޔަރުކުރެވިފައިވަނީ ނ. މާޅެންދޫ، ފެހިއައްސޭރި އަޙްމަދު ރިޝްފާން (32 އަހަރު) އެވެ.
ފުލުހުންގެ މަޢުލޫމާތު ދެއްވާ ގޮތުގައި، އަޙްމަދު ރިޝްފާން ހައްޔަރުކުރެވިފައިވަނީ މި މަހުގެ 27 ވަނަ ދުވަހު އެވެ. އޭނާ ހައްޔަރުކުރެވުނީ ސްޓެލްކޯގެ ޓްރާންސްފޯމަރަކުން ވައްކަން ކުރަން ވަދެ އޮއްވަ އެވެ.
ސްޓެލްކޯގެ ޓްރާންސްފޯމަރުތަކުން ވައްކަންކުރުމުގެ މައްސަލަތައް އިތުރުވަމުން ދިއުމާ ގުޅިގެން، ފުލުހުން ވަނީ މި ފަދަ ޢަމަލުތައް ހުއްޓުވުމަށް ޚާއްޞަ ސަމާލުކަމެއް ދެމުންދާ ކަމަށް ކުރިން ބުނެފަ އެވެ. އަދި ޓްރާންސްފޯމަރުތަކުން ވައްކަން ކުރިޔަ ނުދިނުމަށްޓަކައި، ޓްރާންސްފޯމަރުތައް ވަށާ ފާރު ރާނައި، ފެންސުވެސް ވަނީ ޖަހާފަ އެވެ.
މީގެކުރިން ޓްރާންސްފޯމަރަކުން ވައްކަން ކުރުމަށް މަސައްކަތްކުރި މީހެއް ކަރަންޓުގައި ޖެހި މަރުވެސްވެފަ އެވެ.
