މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ލޭންޑްމާކު ފަރުމާ ކުރުމުގެ މުބާރާތެއް ހުޅުވާލައިފި އެވެ.
މި މުބާރާތަކީ ރާއްޖޭގެ ހިތްގައިމުކަން ދައްކުވައިދިނުމާއި، ދިވެހިންގެ ފަންނުވެރިކަން ދައްކާލުމަށާއި ފަތުރުވެރިންނަށް ރާއްޖެއިން ލިބެންހުރި ތަފާތު ތަޖުރިބާތައް އިތުރުކުރުމުގެ މަގުސަދުގައި ބާއްވާ މުބާރާތެއް ކަމަށް އެމްއެމްޕީއާރުސީން މައުލޫމާތު ދީފައިވެ އެވެ.
އެމްއެމްޕީއާރުސީން ބުނި ގޮތުގައި، މި މުބާރާތުގައި ލޭންޑްމާކް ބެހެއްޓުމަށް ރޭވިފައިވަނީ މާލެ ސަރަޙައްދު ފިޔަވައި އެހެނިހެން ރަށްތަކުގަ އެވެ. އަދި އެކިއެކި ރަށްތަކާއި ސަރަޙައްދުތަކުގެ މުއްސަނދި ތަރިކައާއި ސަގާފަތާއި ހިތްގައިމު ގުދުރަތީ ރީތިކަން ދައްކުވައިދޭ ފަރުމާތައް ހުށައެޅުމަށް ބާރުއަޅާފައިވެ އެވެ.
މި މުބާރާތުގައި ބައިވެރިވުމުގެ ފުރުސަތު 18 އަހަރުން މަތީގެ ކޮންމެ ދިވެހި ރައްޔިތަކަށް ހުޅުވާލާފައިވާ ކަމަށް އެމްއެމްޕީއާރުސީން ހާމަކޮށްފައިވެ އެވެ. މުބާރާތުގެ އެންމެ މޮޅު 10 ފަރުމާ ހޮވާނީ ޓެކްނިކަލް ޖަޖުންގެ ޕެނަލެއްގެ އިވެލުއޭޝަނާއި އާންމުންގެ ވޯޓާ އެއްކޮށްގެން ނެވެ.
މުބާރާތުގައި އެންމެ މަތިން މާކްސް ލިބޭ 10 ފަރާތަކަށް 20،000 ރުފިޔާގެ ފައިސާގެ އިނާމަކާއި ސްޕޮންސަރުންގެ ހެޔޮ އެދުންތަކާއެކު ގިފްޓް ޕެކެއް ހަދިޔާކުރާނެ ކަމަށް އެމްއެމްޕީއާރުސީން ބުނެފައިވެ އެވެ. މީގެ އިތުރުން، ހޮވޭ އެންމެ މޮޅު 10 ފަރުމާ އެމްއެމްޕީއާރުސީގެ މާކެޓިންގ ހަރަކާތްތަކުގައި ބޭނުންކުރުމަށް ހަމަޖެހިފައިވަނީ ފަރުމާކުރި ފަރާތްތަކަށް ކްރެޑިޓް ދީގެން ކަމުގައިވެސް އެމްއެމްޕީއާރުސީން ފާހަގަކޮށްފައިވެ އެވެ.
މި މުބާރާތަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށާއި، ދިވެހިންގެ އުފެއްދުންތެރިކަން ދައްކާލުމަށް ލިބިގެންދާނެ ރަނގަޅު ފުރުސަތެއް ކަމަށް ފަތުރުވެރިކަމުގެ ދާއިރާގެ ފަރާތްތަކުން ދެކެ އެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ފަތުރުވެރިކަން
