ހަނުހުރުމަކީ މުއުމިނުންގެ ސިފަތަކުގެތެރޭގައި ހިމެނޭ ސިފައެއް ކަމަށާއި، އެއީ ބުއްދިވެރީންނާއި ވިސްނުންތެރީންގެ ސިފައެއް ކަމަށް މިއަދުގެ ހުކުރު ހުތުބާގައި ވިދާޅުވެއްޖެ އެވެ.
މިއަދުގެ ހުކުރު ހުތުބާ އަލިއަޅުވާލައިފައި ވަނީ ހަނުހުރުމުގެ އަހުލާގުގެ މަށްޗަށެވެ.
ހުތުބާގައި ވިދާޅުވީި ގޮތުގައި، ހިފެހެއްޓުމެއްނެތް ދުލަކީ ޝައިޠާނާގެ އަތަށް ދޫކޮށްލެވޭ ވައުގަނޑެއް ކަމަށާއި، އިންސާނާ ބާޠިލު ވާހަކަތަކާ ދުރުހެލިވެ ހުރެއްޖެ ނަމަ، އޭނާ ވާނީ ސުވަރުގޭގެ އަހުލުވެރިއަކަށް ކަމަށެވެ. އަދި އިތުރަށް ވިދާޅުވީީ، އިންސާނާ ބާޠިލު ވާހަކަދައްކަން ފަށައިފި ނަމަ ޝައިޠާނާ އޭނާ އަތްއަތަށް ދަމާން ފަށައިފާނެ ކަމަށާއި، އެކަލޭގެ އެދޭގޮތަށް އެދޭ ކޮންމެ ވަގުތަކު އޭނާ އަނބުރައިލައިފާނެ ކަމަށެވެ.
އިމާމު އިތުރަށް ވިދާޅުވި ގޮތުގައި، އިންސާނާ ވަޒަން ކުރެވޭނީ އޭނާގެ ދުލުން ބުނާ ބަސްތަކުން ކަމަށެވެ. ”އިންސާނާ ހަނުހުރެއްޖެ ނަމަ އޭނާއާ މެދު، ނިޔާއެއް ކަނޑައަޅާކަށް ނޭނގޭނެ. ނަމަވެސް އޭނާ ވާހަކަދައްކައިފި ނަމަ، އޭނާގެ ޝަޚްޞިއްޔަތު ފާޅުވާނެ,“ އިމާމު ވިދާޅުވި އެވެ.
މާތްﷲއަށް ތަގުވާވެރިވެ، ހަނުހުރުމުގެ ޚުލްޤުން ޒީނަތްތެރިވާން ޚުތުބާގައި ވަނީ ގޮވާލައިފަ އެވެ. ބޭނުންވާ މިންވަރަށް އެކަނި ވާހަކަދެއްކުމަށާއި މި ޒަމާނުގެ މީސްމީޑިޔާތަކުގެ މަންސަތަކަށް ވަދެ ވަގުތުތައް ބޭކާރު ގޮތުގައި ހޭދަނުކުރުމަށް ޚުތުބާގައި ވަނީ ގޮވާލާފަ އެވެ.
ހުތުބާގައި ބަޔާންކޮށްދިން ގޮތުގައި ހަނުހުރުމުގެ އިމަކީ ތިބާއާ ބެހޭ ކަންކަމުގައި ރިވެތި ބަހުން ބަސްބުނުމެވެ. އަދި އެމީހެއްގެ ދުލުން ނުކުންނަ ކޮންމެ ލަފްޒަކާމެދު ގިޔާމަތްދުވަހުން ސުވާލުކުރެވޭނެކަން ހުތުބާގައި ހަނދާންކޮށްދީފައިވެ އެވެ.
