ބޭންކް އޮފް މޯލްޑިވްސް (ބީއެމްއެލް) އިން އަލިފު އަލިފު އަތޮޅު ހިމަންދޫގައި އައު އޭޓީއެމް ސެންޓަރެއް ހުޅުވައިފި އެވެ.
މިއީ ބޭންކިންގ ޚިދުމަތް ފުޅާކުރުމަށް ބީއެމްއެލްއިން ކުރަމުންދާ މަސައްކަތުގެ ތެރެއިން އަޅާފައިވާ އިތުރު ފިޔަވަޅެކެވެ.
ބީއެމްއެލްއިން މަޢުލޫމާތު ދެއްވާފައިވާ ގޮތުގައި، މި އައު އޭޓީއެމް ސެންޓަރު މެދުވެރިކޮށް ރައްޔިތުންނަށް ދުވާލަކު 24 ގަޑިއިރު އަސާސީ ބޭންކިންގ ޚިދުމަތްތައް ލިބިވަޑައިގަންނަވާނެ އެވެ. މީގެ ތެރޭގައި ފައިސާ ނެގުމާއި، ޖަމާކުރުމާއި އަދި ފައިސާ ޓްރާންސްފަރ ކުރުން ހިމެނެ އެވެ.
ހިމަންދޫގައި ހުޅުވުނު އޭޓީއެމް ސެންޓަރުގެ އިތުރުން، އަލިފު އަލިފު އަތޮޅުގެ ފެރިދޫ އާއި ބޮޑުފޮޅުދޫގައި ވެސް ދާދި ފަހުން އޭޓީއެމް ސެންޓަރުތަކެއް ހުޅުވާފައިވެ އެވެ. މިހާރު އަލިފު އަލިފު އަތޮޅުގައި ބީއެމްއެލްއިން ޖުމްލަ 7 އޭޓީއެމް ސެންޓަރު ގާއިމްކޮށްފައިވާކަމަށް ބޭންކުން ހާމަކޮށްފައިވެ އެވެ.
ބީއެމްއެލްއަކީ މުޅި ރާއްޖެ ހިމެނޭ ބޭންކިންގ ވިއުގައެއް ގާއިމުކޮށްފައިވާ ބޭންކެކެވެ. މިގޮތުން 20 އަތޮޅުގައި 39 ބްރާންޗް، 92 ސެލްފްސަރވިސް ބޭންކިންގ ސެންޓަރ، 148 އޭޓީއެމް، އަދި އޭޖެންޓު ބޭންކިންގ ޚިދުމަތް ފޯރުކޮށްދެއެވެ. މީގެ އިތުރުން، އެންމެ ޒަމާނީ އޮންލައިން ބޭންކިންގ ޚިދުމަތްތައް ވެސް ބީއެމްއެލްއިން ފޯރުކޮށްދެ އެވެ.
ބޭންކުގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމަޢުތަކަށް އެހީތެރިކަން ފޯރުކޮށްދިނުން ކަމަށް ބީއެމްއެލްއިން ބުނެފައިވެ އެވެ. މި އައު އޭޓީއެމް ސެންޓަރު ހުޅުވުމާއެކު، ހިމަންދޫގެ ރައްޔިތުންނަށް ފަސޭހަކަމާއެކު ބޭންކިންގ ޚިދުމަތްތައް ލިބިގެންދާނެ ކަމަށް ބެލެވެ އެވެ.
