ކ. ގުރައިދޫގެ ފަތުރުވެރިކަމުގެ ދާއިރާ ކުރިއެރުވުމަށް އަމާޒުކޮށް، ”އެކްސްޕްލޯ ގުރައިދޫ“ ގެ ނަމުގައި އައު ބްރޭންޑެއް ރަސްމީކޮށް ތަޢާރަފްކޮށްފި އެވެ.
މި ބްރޭންޑް އިފްތިތާހުކޮށްދެއްވީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މެނޭޖިންގ ޑިރެކްޓަރ އިބްރާހިމް ޝިއުރީއާއި ގުރައިދޫ ކައުންސިލުގެ ރައީސް ހުސެއިން ޔާމީން މުހައްމަދެވެ.
ގުރައިދޫ ކައުންސިލުން އިސްނަގައިގެން ތަޢާރަފްކުރި މި ބްރޭންޑަކީ މުޅި ދުނިޔެއަށް ގުރައިދޫން މަރުހަބާ ކިޔުމަށް ތައްޔާރުވެއްޖެކަން އަންގައިދޭ ބްރޭންޑެކެވެ. މިއީ ރަށުގެ ފަތުރުވެރިކަމުގެ ދާއިރާ ކުރިއެރުވުމަށް އެޅޭ މުހިންމު ފިޔަވަޅެއްކަމަށް ބެލެވެ އެވެ.
ބުދަ ދުވަހުގެ ރޭ ބޭއްވުނު ޚާއްޞަ ހަފްލާގައި، ގުރައިދޫގެ ފަތުރުވެރިކަމުގެ ބްރޭންޑް ފަރުމާކުރުމާއި ފަތުރުވެރިކަމުގެ ދާއިރާއިން ގުރައިދޫ ކުރިއަރުވަން މަސައްކަތް ކޮށްދެއްވާ 9 ފަރާތެއް ވަނީ ޚާއްޞަކޮށް ފާހަގަކޮށްފަ އެވެ. މީގެ ތެރޭގައި އެމްއެމްޕީއާރުސީގެ މެނޭޖިންގ ޑިރެކްޓަރ ޝިއުރީއާއި، ގުރައިދޫ ދާއިރާގެ މަޖިލިސް މެންބަރު ރިޒާ، އަދި ބްރޭންޑިންގގެ މަސައްކަތް ކޮށްދިން ކުންފުންޏާއި ގުރައިދޫގައި ހަރަކާތްތެރިވާ އެކި ވިޔަފާރިތައް ހިމެނެ އެވެ.
”އެކްސްޕްލޯ ގުރައިދޫ“ ބްރޭންޑް ތަޢާރަފްކުރުމާއެކު، ގުރައިދޫގެ ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ލިބި، ބޭރުގެ ފަތުރުވެރިން އިތުރަށް ޝައުޤުވެރިވާނެކަމަށް އުންމީދުކުރެވެ އެވެ. މި ބްރޭންޑްގެ ސަބަބުން ގުރައިދޫގެ ޚާއްޞަ ސަގާފަތާއި ދިރިއުޅުމުގެ ވައްޓަފާޅި އިތުރަށް ފާހަގަކުރެވި، ރަށުގެ އިޤްތިޞާދަށް ފައިދާކުރާނެކަމަށް ބެލެވެ އެވެ.
ކ. ގުރައިދޫ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)
