ބަޖެޓުގައި ފައިސާ ނެތި މަޝްރޫއުތައް ނުފަށާނެ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
މާލިއްޔަތު ކޮމެޓީގައި މިއަދުގެ ބައްދަލުވުމުގައި ބައިވެރިވެވަޑައިގެން ވާހަކަ ދައްކަވަމުން މިނިސްޓަރު ޒަމީރު ވިދާޅުވީ ކުޑަ އަަދަދުތަކެއް ބަޖެޓްގައި ޖަހައިގެން ކުރީ ސަރުކާރުން ހެދިގޮތަށް މަޝްރޫއުތައް ނުހިންގާނެ ކަމަށެވެ.
ސަރުކާރުގެ ކުންފުނިތައް ހަރުދަނާ ކުރުމަކީ ރައީސް ޑރ. މުހައްމަދު މުއިއްޒުގެ މައިގަނޑު ލަފާފުޅުކަން ފާހަގަކޮށް މިނިސްޓަރު ޒަމީރު ވިދާޅުވީ ކުރީ ސަރުކާރުން ކުންފުނިތަކަށް ފައިސާ ޕަންޕު ކުރިގޮތަށް ފައިސާ ދިނުމުގެ ވިސްނުމެއް ނެތް ކަމަށެވެ. އަދި ކުންފުނިތަކުން ސަރުކާރަށް ބަރޯސާވާވުން ނިމުމަކަށް ގެނައުމަކީ ރައީސް މުއިއްޒުގެ ވިސްނުންފުޅުކަމަށްވެސް ވިދާޅުވި އެވެ.
ކުރީ ސަރުކާރުން ކުޑަ އަަދަދުތަކެއް ޖެހުމަށްފަހު ގިނަ މަޝްރޫއުތަކެއް ބަޖެޓް ކޮށްފައި ހުރުމުން މިސަރުކާރުން އަންނަނީ އެކަމުގެ ކަންބޮޑުވުން ފާޅުކުރަމުންނެވެ. އަދި މަޝްރޫއުތަކަށް ބޭނުންވާ ފައިސާ ނެތުމުން އެ އަދަދުތައް ހިމަނައިގެން ވަނީ ސަޕްލިމެންޓަރީ ބަޖެޓްވެސް ހުށަހަޅާފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލިސް މާލިއްޔަތު ކޮމެޓީ މިނިސްޓްރީ އޮފް ފިނޭންސް ފިނޭންސް މިނިސްޓަރު މޫސާ ޒަމީރު
