ސައްހަ ނޫން 500 ރުފިޔާ މާރުކުރަން އުޅުނު މީހެއްގެ ބަންދަށް 3 ދުވަސް ކްރިމިނަލް ކޯޓަށް އިއްޔެ ހާޒިރުކުރުމުން ޖަހައިފި އެވެ.
މި މައްސަލާގައި ފުލުހުންގެ ހައްޔަރަށް ގެންދިޔައީ ކ. ކާށިދޫ, ހައިވަކަރުގެ, އަބްދުﷲ ސައީދު (54އ) އެވެ.
ސައީދުގެ ބަންދުގެ މުއްދަތު ޖެހި ކޯޓު އަމުރުގައި ބުނެފައިވަނީ ކުށްކުރިކަމަށް ތުހުމަތުކުރެވޭ ކޮންމެވެސް މިންވަރެއްގެ ހެކި ހުށަހަޅިފައިވާ ކަމަށެވެ.
އެ އަމުރުގައި ބުނެފައިވަނީ، ސައްހަނޫން 500 ރުފިޔާގެ ނޫޓެއް ކެފޭއަކުން މާރުކުރުމަށް އެ މީހާ މަސައްކަތް ކޮށްފައިވާ ކަމަށެވެ. އެހެންނަމަވެސް، އެ ރުފިޔާ މާރުކުރަން އުޅުނީ މީހަކު ބުނެގެން ކަމަށް އޭނާ ބުންނެފައިވާ ކަމަށެވެ.
އަދި ސައީދު ކޯޓުގައި ބުނެފައި ވަނީ، އެއީ ސައްހަނޫން ފައިސާކަން ނޭނގޭ ކަމަށެވެ.
އޭނާ ބަންދުގައި ބަހައްޓަން ޖެހޭ ހާލަތް އޮތް ކަމަށް ކޯޓު އަމުރުގައި ފާހަގަކޮށްފައިވަނީ އެއީ ކައުންޓަފީޓް ނޫޓާ ގުޅޭ މައްސަލައަކަށްވާތީ އެވެ.
