ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން އ އިން އިލެކްޓްރޯނިކް ކުނި ހިލޭ އުކާލުމުގެ ފުރުސަތު ހުޅުވާލައިފި އެވެ.
މި ފުރުސަތު ހުޅުވާލީ ދުނިޔޭގެ އީ-ވޭސްޓް ނުވަތަ އިލެކްޓްރޯނިކް ކުނީގެ ދުވަސް ފާހަގަކުރުމުގެ ގޮތުންނެވެ.
ވެމްކޯއިން އެކްސްގައި ކުރި އިއުލާނެއްގައި ބުނެފައިވަނީ މާދަމާ (އޮކްޓޫބަރު 14) ވެމްކޯގެ ޓްރާންސްފާ ސްޓޭޝަންތަކުން ހިލޭ އީ-ވޭސްޓް ޑްރޮޕް އޮފް ކުރުމުގެ ފުރުސަތު ހުޅުވާލާފައިވާ ކަމަށެވެ. މި ހިލޭ ޚިދުމަތް ފޯރުކޮށްދޭނީ މާދަމާ ހެނދުނު 9:00 އިން ރޭގަނޑު 10:00 އަށް މާލެ، ހުޅުމާލެ، އަދި ވިލިމާލޭގައެވެ.
އީ-ވޭސްޓް ދުވަސް ފާހަގަކުރަނީ ކޮންމެ އަހަރެއްގެވެސް އޮކްޓޫބަރު 14 ގައެވެ. މިއީ އީ-ވޭސްޓް ރީސައިކަލް ކުރުމުގެ މުހިންމުކަން އާންމުންގެ މެދުގައި ހޭލުންތެރިކުރުވުމަށް 2018 ވަނަ އަހަރު ވޭސްޓް ފްރޮމް އިލެކްޓްރިކަލް އެންޑް އިލެކްޓްރޯނިކް އިކުއިޕްމަންޓް (ޑަބްލިޔުއީއީ) ފޯރަމްއިން ތަޢާރަފުކުރި ދުވަހެކެވެ.
މި ފުރުސަތުގެ ސަބަބުން، ރައްޔިތުންނަށް އެމީހުންގެ ބޭނުންހަމަވެފައިވާ އިލެކްޓްރޯނިކް ތަކެތި ރަނގަޅު ގޮތުގައި ނައްތާލުމަށް ފަސޭހަވެގެންދާނެއެވެ. އަދި މިކަމުގެ ސަބަބުން ތިމާވެށި ހިމާޔަތްކުރުމަށާއި އިލެކްޓްރޯނިކް ކުނީގެ ސަބަބުން ކުރިމަތިވާ ގެއްލުންތައް ކުޑަކުރުމަށް އެހީތެރިވެގެންދާނެއެވެ.
