ދޮގާއި ފުރައްސާރައިގެ ބާޒާރަކީ އިސްލާމީ ސަގާފަތުގައި ޖާގައެއް އޮތް ބާޒާރެއް ނޫން ކަމަށް ވިދާޅުވެ، ދޮގު ހެދުމާއި ފިތުނަވެރި ޢަމަލުތަކުން ދުރުހެލިވުމަށް ރައީސް ޑރ. މުހައްމަދު މުއިއްޒު ގޮވާލައްވައިފި އެވެ.

ރައީސުލްޖުމްހޫރިއްޔާ މިކަމަށް އެދިވަޑައިގެންނެވީ ދިވެހިރާއްޖެ އިސްލާމްވި ދުވަހުގެ މުނާސަބަތު ފާހަގަކުރުމަށް މިއަދު ހެނދުނު ދަރުބާރުގޭގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ނެވެ. އެ ވާހަކަފުޅުގައި އެމަނިކުފާނު އެންމެ ހާއްސަކަމެއްގެ ގޮތުގައި ގޮވާލެއްވ ދޮގު ހެދުމާއި، ދޮގު ޚަބަރު ފެތުރުމާއި، އަދި ފިތުނަވެރި ޢަމަލުތަކުން ދުރުހެލިވުމަށެވެ.

އެ މޭރުމުން ވާހަކަފުޅު ކުރުއިށްގެންދަވަމުން ރައީސް ވިދާޅުވީ މުސްލިމުންނަކީ ލޮލުން ބަލާ ބެލުމާއި، ދުލުން ބުނާ ބަހާއި، ކަންފަތުން އަޑުއަހާ އަޑުއެހުން ފަދަ ހުރިހާ ކަމެއްގައި މާތްﷲގެ ދަރުބާރުގައި ޖަވާބުދާރީވާންޖެހޭ ބައެއް ކަމަށެވެ. އަދި ދޮގާއި ފަަސާދައާއި ފުރައްސާރައަކީ އިސްލާމީ ސަގާފަތުގައި ޖާގައެއް އޮތްކަމެއް ނޫން ކަމަށް އެމަނިކުފާނު ވިދާޅުވި އެވެ. އެފަދަ ކަންކަން އިސްލާމީ ތާރީހުގެ ކުރީކޮޅުގައި އެއިރުގެ މުސްލިމު މުޖުތަމައުގައި ފެތުރެން ފެށުމުން އެކަންކަމާމެދު ކީރިތި ގުރުއާނާއި ރަސޫލާގެ ސުންނަތުގައި އިންޒާރު ކުރައްވާފައިވާކަމަށް ރައީސް ވިދާޅުވި އެވެ.

ރައީސުލްޖުމްހޫރިއްޔާ އެ ޖަލްސާގައި ދެއްކެވި ވާހަކަފުޅުގައި، ދިވެހި ރައްޔިތުންނަށް ނިޔަތާއި ބަހާއި ޢަމަލުން އިސްލާމްދީނުގައި ސާބިތުވެ ތިބުމަށް އިލްތިމާސްކުރެއްވި އެވެ. އަދި ދިވެހިރާއްޖެ އިސްލާމްދީން ޤަބޫލުކުރުމުގެ އެއް ސަބަބަކީ އިސްލާމްދީނުން ލިބޭ އަމާންކަމާއި ރައްކާތެރިކަންކަމަށް ފާހަގަކުރެއްވި އެވެ.

ރައީސް މުޢިއްޒު އިތުރަށް ވިދާޅުވީ، ދިވެހިރާއްޖެ އިސްލާމްވި ދުވަހު ނަމޫނާ ލިބިގަންނަންވީ ރަސޫލުﷲ ޞައްލަﷲ ޢަލައިހިވަސައްލަމަގެ މޫރިތި އަޚްލާޤީ ސިފަފުޅުތަކުން ކަމަށެވެ.

މި ޖަލްސާގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދުގެ އިތުރުން ދައުލަތާއި ސަރުކާރުގެ އިސްވެރިން ބައިވެރިވެވަޑައިގެންނެވި އެވެ. އަދި މި ޖަލްސާގައި ޙާފިޡްކަމުގެ ސަނަދު ހާސިލުކުރެއްވި ބޭފުޅުންނަށް ރައީސުލްޖުމްހޫރިއްޔާ މެޑެއްޔާއި އިނާމާއި ހަނދާނީ ލިޔުން ދެއްވި އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖެ އިސްލާމްވީ ދުވަސް