މަތީ ސާނަވީ ތައުލީމު ހާސިލްކުރާ ދަރިވަރުންގެ އަދަދު އިތުރުވުމަކީ، ގައުމީ އުފެއްދުންތެރިކަމާއި ތަރައްގީއަށް ބޮޑު ދައުރެއް އަދާކުރާ ޖީލެއް އުފެއްދުމުގައި މުހިންމު ކަމެއް ކަމަށް މިނިސްޓަރ އޮފް އެޑިއުކޭޝަން ޑރ. އިސްމާއީލް ޝަފީއު ވިދާޅުވެއްޖެ އެވެ.
ހަތްވަނަ ބައިނަލްއަގްވާމީ ޓީޗަރުންގެ ކޮންފަރެންސްގެ އިފްތިތާހީ ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ ރައީސް ޑރ. މުހައްމަދު މުއިއްޒުގެ ލަފާފުޅަށް ތަބާވެ، އެޑިއުކޭޝަން މިނިސްޓްރީން ކުރި މަސައްކަތްތަކަކީ ނަތީޖާ ނެރެފައިވާ މަސައްކަތްތަކެއް ކަމަށެވެ. އެގޮތުން އޭނާ ހާމަކުރެއްވި ގޮތުގައި މަތީ ސާނަވީ ތައުލީމު (އޭ ލެވެލް) ހޯދުމަށް ނަން ނޯޓްކުރި ދަރިވަރުންގެ އަދަދު މިދިޔަ އަހަރާ އަޅާބަލާއިރު 10 އިންސައްތައިން އިތުރުވެފައި ވެއެވެ.
މީގެ އިތުރުން މިނިސްޓަރު ޑރ. ޝަފީއު ވިދާޅުވީ މި މަސައްކަތްތަކުން ނެރެވޭނެ ކަމަށް ލަފާކުރެވޭ ނަތީޖާއަކީ ޔުނިވަރސިޓީތަކުގައި ދަރިވަރުން ކިޔަވަން ވަންނަ މިންވަރު އިތުރުވުމާއި ތައުލީމީ ދާއިރާއަށް ޖުމްލަކޮށް ކުރިއެރުން ލިބުމެވެ. އަދި ޔުނިވާސިޓީތަކުން ތައުލީމީ ޖީލެއް ބިނާކުރުމާއި، ގައުމުގެ އުފެއްދުންތެރިކަމާއި ތަރައްގީއަށް ހިއްސާވުންވެސް ހިމެނެ އެވެ.
ދިރާސާގެ ބޭނުމުގައި ހާއްސަ ކޮންފަރެންސެއް ބާއްވާއިރު، ރާއްޖޭގައި ތައުލީމު ފޯރުކޮށްދޭ ފެންވަރު ވަޒަން ކުރުމުގެ މުހިންމުކަން މިނިސްޓަރ ފާހަގަކުރެއްވި އެވެ. މިއީ ތައުލީމީ ދާއިރާ ހަރުދަނާ ކުރުމަށް އެޅި ވަރަށް މުހިންމު ފިޔަވަޅެއް ކަމަށް މިނިސްޓަރ ވިދާޅުވި އެވެ.
މީގެ އިތުރުން، ތައުލީމީ ދާއިރާ ތަރައްގީ ކުރުމަށް ކުރާ ހަރަދާ އަޅާބަލާއިރު، އިމްތިހާނުން ފާސްވާ ދަރިވަރުންގެ ނިސްބަތް މަދުވުމުން ކަންބޮޑުވުން ފާޅުކުރެއްވި އެވެ. އެގޮތުން، އޯލެވެލް އިމްތިހާނުން ފާސްވާ ދަރިވަރުންގެ ނިސްބަތް 60 އިންސައްތަ އިން 50 އިންސައްތަ އަށް ދަށްވެފައިވާކަން މިނިސްޓަރ ހާމަކުރެއްވި އެވެ. އޭނާ ވިދާޅުވީ މިކަމުގެ ސަބަބުން އަނެއްކާވެސް ޔުނިވާސިޓީތަކުގައި ކިޔަވަމުންދާ ދަރިވަރުންގެ އަދަދު މަދުވެގެންދާނެ ކަމަށެވެ. އެހެންކަމުން މިމައްސަލަ ހުރިހާ ވަގުތެއްގައިވެސް ހަނދާނުގައި ބަހައްޓަން ހުރިހާ އެންމެންނަށްވެސް އެމަނިކުފާނު އިލްތިމާސް ކުރެއްވި އެވެ. ތައުލީމީ ދާއިރާގެ ތެރޭގައި ހުރި ގޮންޖެހުންތައް ދެނެގަނެ، އިންސާނީ ވަސީލަތްތައް އިތުރުކޮށް، މަތީ ތައުލީމު ހާސިލްކުރާ ދަރިވަރުންގެ އަދަދު އިތުރުކުރުމަށް މަސައްކަތްތަކެއް ކުރެވެމުންދާކަން މިނިސްޓަރ ކަށަވަރުކޮށްދެއްވި އެވެ.
