ގއ. ކަނޑުހުޅުދޫ ޓުއަރިޒަމް ޒޯނުން ގެސްޓްހައުސް ތަރައްޤީކޮށް ހިންގުމަށް 9 ބިމެއް 50 އަހަރުގެ މުއްދަތަށް ކުއްޔަށް ދޫކުރުމަށް ކައުންސިލުން އިއުލާންކޮށްފި އެވެ.
ކަނޑުހުޅުދޫ ކައުންސިލުން އިއުލާން ކޮށްފައިވާ ގޮތުގައި، އެ ރަށުގެ ޓުއަރިޒަމް ޒޯނުން ގެސްޓްހައުސް ތަރައްޤީކޮށް ހިންގުމަށް 9 ބިމެއް 50 އަހަރުގެ މުއްދަތަށް ކުއްޔަށް ދޫކުރުމަށް ވަނީ ނިންމާފަ އެވެ. މި ބިންތަކުގެ ތެރޭގައި ހިމެނެނީ 3000 އަކަފޫޓުގެ 4 ބިމާއި، 5000 އަކަފޫޓުގެ 3 ބިމާއި، އަދި 10000 އަކަފޫޓުގެ 2 ބިމެވެ.
މި މަޝްރޫޢުގައި ބައިވެރިވުމަށް ޝައުޤުވެރިވާ ފަރާތްތަކަށް 13 އޮކްޓޯބަރ 2024 ވަނަ ދުވަހުގެ މެންދުރު 12:00 ގެ ކުރިން ބިޑް ރަޖިސްޓްރީ ކުރުމަށް ވަނީ އަންގާފަ އެވެ.
މި ބީލަމުގައި ބައިވެރިވެވޭނީ މިނިސްޓްރީ އޮފް އިކޮނޮމިކް ޑިވެލޮޕްމަންޓުގައި ވިޔަފާރި ރަޖިސްޓްރީކޮށްފައިވާ ފަރާތްތަކަށް އެކަނި ކަމަށް ކައުންސިލުން ވަނީ ބަޔާންކޮށްފަ އެވެ. ބީލަންވެރިންނަށް މަޢުލޫމާތު ދިނުމުގެ ބައްދަލުވުން އޮންނާނީ 15 އޮކްޓޯބަރ 2024 ވަނަ ދުވަހުގެ ހެނދުނު 11:00 ގައި ކައުންސިލް އިދާރާގެ މީޓިންގ ރޫމުގައި ކަމަށާއި، ހާޒިރުވެވެން ނެތް ފަރާތްތަކަށް އޮންލައިންކޮށް ބައިވެރިވުމުގެ ފުރުޞަތު ވެސް ލިބިގެންދާނެ ކަމަށް ވަނީ އަންގާފަ އެވެ.
ބީލަން ބަލައިގަތުމާއި ބީލަން ހުޅުވުން އޮންނާނީ 30 އޮކްޓޯބަރ 2024 ވަނަ ދުވަހުގެ ހެނދުނު 11:00 ގައި ކައުންސިލް އިދާރާގެ މީޓިންގ ރޫމުގަ އެވެ. ބީލަން ހުށަހެޅުމަށް ރަޖިސްޓްރީ ނުކުރާ ފަރާތްތަކާއި، ގަޑިޖެހުމަށްފަހު ހުށަހަޅާ ބީލަންތަކާއި، އީމެއިލް އަދި ފެކްސްގެ ޒަރީއާއިން ފޮނުވާ ބީލަންތައް ބަލައިނުގަނެވޭނެ ކަމަށް ކައުންސިލުން ވަނީ އަންގާފަ އެވެ.
މި މަޝްރޫޢުގެ ސަބަބުން ކަނޑުހުޅުދޫގެ ފަތުރުވެރިކަމުގެ ދާއިރާއަށް އިތުރު ކުރިއެރުމެއް ލިބި، ރަށުގެ އިޤްތިޞާދަށް ފައިދާތަކެއް ކުރާނެ ކަމަށް އުއްމީދު ކުރެވެ އެވެ.
