އޭޝިއާ ޕެސިފިކް ރީޖަނަލް ފޯރަމް އޮން ހެލްތު އެންޑް އެންވަޔަރަންމަންޓް (އޭ.ޕީ.އާރު.އެފް.އެޗް.އީ) ގެ 5 ވަނަ މިނިސްޓަރުންގެ ބައްދަލުވުމާއި  12 ވަނަ ހައި ލެވެލް އޮފިޝަލްސް މީޓިން (އެޗް.އެލް.އޯއެ.މް) ގައި ބައިވެރިވަޑައިގަތުމަށް މިނިސްޓަރ އޮފް ހެލްތު ޑރ. އަބްދުﷲ ޚަލީލް އިންޑޮނޭޝިޔާއަށް އިއްޔެ ފުރާވަޑައިގެންފި އެވެ.

ހެލްތް މިނިސްޓްރީން ބުނީ ސެޕްޓެމްބަރ 24-26 އަށް އިންޑޮނޭޝިއާގެ ޖަކާޓާ އަށް ކުރައްވާ މި ދަތުރުފުޅުގައި އެ ގައުމުގެ ސިއްހީ ދާއިރާގެ ފަންނީ ބޭފުޅުންނާއި ބައްދަލުކުރައްވާ އެކި އެކި ސިއްހީ ހިދުމަތްދޭ ތަންތަނަށް ޒިޔާރަތް ކުރެއްވުމަށް ވަނީ ހަމަޖެހިފައިވާ ކަމަށެވެ. ހާއްސަކޮށް ޕްރައިމަރީ ހެލްތްކެއާ، އުމުރުން ދުވަސްވީ މީހުންނަށް ފަރުވާ ދިނުމުގެ ކަންކަން، ހެލްތު އިންފޮމޭޝަން ސިސްޓަމްތަކާއި، ސިއްހީ ހިދުމަތްތަކުގައި ޑިޖިޓަލް ޓޫލްސް ބޭނުންކުރުން ފަދަ ދާއިރާތަކާއި ގުޅޭ ކަންކަން ބައްލަވާ މަޝްވަރާ ކުރެއްވުމަށް ވަނީ ހަމަޖެހިފަ އެވެ. އަދި އެގައުމުގައި މިފަދަ ކަންކަން ކުރަމުން އަންނަގޮތް ބަލާ އެ ގައުމުގެ ތަޖުރިބާގެ މައްޗަށް، ރާއްޖޭގެ ސިއްހީ ހިދުމަތް ފޯރުކޮށްދިނުމުގެ ކަންކަން ހަރުދާނާ ކުރުމާއި ގުޅޭ ގޮތުން މަޝްވަރާކުރުމަށް ވަނީ ހަމަޖެހިފަ އެވެ.

އޭޝިއާ ޕެސިފިކް ރީޖަނަލް ފޯރަމް އޮން ހެލްތު އެންޑް އެންވަޔަރަންމަންޓް ފޯރަމްގެ އަމާޒަކީ މެންބަރު ގައުމުތަކުން ނޭޝަނަލް އެންވަޔަރަންމަންޓަލް ހެލްތު އެކްޝަން ޕްލޭންތައް ތަންފީޒު ކުރުމަށް ހިތްވަރު ދިނުމެވެ. ރާއްޖެއިން މި ފޯރަމްގައި ބައިވެރިވުމުން ފަންނީ ތަޖުރިބާއާއި އެކި އެކި ވަސީލަތްތައް ހޯދުމުގެ ފުރުސަތު ލިބިގެންދާނެ ކަމަށް ހެލްތް މިނިސްޓްރީން ބުނެފައިވެ އެވެ. އަދި  ދެމެހެއްޓެނިވި، ހަރަދު ކުޑަ ސިއްހީ ފަރުވާއާއި ތިމާވެށީގެ ސިޔާސަތުތައް އެކުލަވާލުމުގައި މެންބަރު ގައުމުތަކުން އެހީތެރިވެދޭނެ ކަމަށްވެސް ލަފާކޮށްފައި ވެއެވެ.

މިނިސްޓަރުގެ މި ދަތުރުފުޅުގެ އެކި ބައްދަލުވުންތަކުގެ ސަބަބުން ރާއްޖެއާއި އިންޑޮނޭޝިއާ އާއި ދެމެދު އޮންނަ ގުޅުން ވަރުގަދަވެ، ރާއްޖޭގެ ސިއްހީ ނިޒާމުގެ ކަންކަން ހަރުދަނާކުރުމަށް އެއްބާރުލުން ލިބިގެންދާނެ ކަމަށް މިނިސްޓްރީން ބުންޏެވެ.