ދައުލަތުގެ ޕްރޮކިއުމަންޓް ސިސްޓަމް ޒަމާނީ ކުރުމަށް ބަދަލުތަކެއް ގެނައުމަށް ފިނޭންސް މިނިސްޓްރީން ނިންމިކަން އިއުލާންކޮށްފި އެވެ.
ފިނޭންސް މިނިސްޓްރީން ބުނީ އިލެކްޓްރޯނިކް ގަވަރމަންޓް ޕްރޮކިއުމަންޓް (އީ-ޖީޕީ) ސިސްޓަމަކީ ސަގާފީ ޕްރޮކިއުމަންޓް އުސޫލުތަކުގެ ޑިޖިޓަލް ޓްރާންސްފޮމޭޝަން ތަމްސީލުކުރާ ނިޒާމެއް ކަމަށެވެ. ރާއްޖެ އަށް އެންމެ އެކަށީގެންވާ ޕްލެޓްފޯމެއްގެ ގޮތުގައި އެ މިނިސްޓްރީން ވަނީ އެސްއޭޕީ އަރީބާ ހޮވާފަ އެވެ. މި ނިޒާމުގެ އަސާސީ މަގްސަދަކީ، ޕްރޮކިއުމަންޓް ޕްރޮސެސްތައް ޒަމާނީކުރުމުގައި ބޮޑު ކުރިއެރުމެއް ލިބިފައިވާ، ހާމަކަން ބޮޑު އަދި ޚަރަދު ކުޑަ ގޮތެއްގައި ސަރުކާރުގެ ޕްރޮކިއުމަންޓް ހަރަކާތްތައް ފަސޭހަކޮށް ދިނުމެވެ.
މީގެ އިތުރުން އާ ނިޒާމުގެ ސަބަބުން ޕްރޮކިއުމަންޓް ޕްރޮސީޖަރތައް އޮޓޮމެޓިކްކޮށް ސްޓްރީމްލައިންކޮށް، އިދާރީ ހަރަދު ކުޑަވެ، ޕްރޮސެސިން ވަގުތު ކުރުވެ، ވަސީލަތްތައް ރަނގަޅަށް ބޭނުން ކުރެވޭނެ ކަމަށް ވެސް މިނިސްޓްރީން ބުނެ އެވެ. އެސްއޭޕީ އަރީބާއާއެކު މިހާރު އެކި ޕްލެޓްފޯމްތަކުގައި ހިނގާ ހުރިހާ ޕްރޮކިއުމަންޓް ހަރަކާތްތަކެއް އެއް ޕްލެޓްފޯމަކަށް އެއްކޮށްލެވޭނެ އެވެ. އެއީ އެއް ނިޒާމެއްގެ ތެރެއިން ސަރުކާރުގެ ޕްރޮކިއުމަންޓްގެ ހުރިހާ ހަރަކާތެއްގައި ސަޕްލައި ކުރާ ފަރާތްތަކަށް ބައިވެރިވެ، މުއާމަލާތުގެ ރަނގަޅުކަމާއި، ކޯޑިނޭޝަން އިތުރުކޮށް، ޕަބްލިކް ފައިނޭންސް އޮޕަރޭޝަންތަކުގެ ތެރޭގައި ނިންމުންތައް ނިންމުމުގެ ފުރުސަތު ލިބިގެންދާނެ ކަމެކެވެ.
މިހާރު އޮތް އެސްއޭޕީ ސިސްޓަމާ އެސްއޭޕީ އަރީބާ އިންޓަގްރޭޓް ކުރުމުން ޕްރޮކިއުމަންޓް ޕްރޮސެސްތައް އިތުރަށް ފުރިހަމަވެ، ސަރުކާރުގެ ހަރަދުތަކުގެ ހާމަކަން ބޮޑުވާނެ ކަމަށް ބެލެވޭކަމަށް ފިނޭންސް މިނިސްޓްރީން ބުނެފައި ވެއެވެ. މިނިސްޓްރީން ވަނީ އާ ނިޒާމުގެ ސަބަބުން ޕްރޮކިއުމަންޓް ޑޭޓާއާއި އެއާ ގުޅުންހުރި މައުލޫމާތު ފަސޭހައިން ލިބި، ހަރަދުތައް ރަނގަޅަށް ޓްރެކްކޮށް މެނޭޖްކުރުމުގެ އިތުރުން ވަގުތުން ރިޕޯޓްތައް އުފެއްދުމުގެ ފުރުސަތު ލިބިގެންދާނެ ކަމަށް އަލިއަޅުވާލާފަ އެވެ.
