އައްޑޫގައި ހިންގަމުންދިޔަ ޝަންގްރިއްލާ އަލުން އޮޕަރޭޝަނަށް ގެނައުމަށް 25 މިލިއަން ޑޮލަރު ބޭނުންވާ ކަމަށް ފަތުރުވެރިކަމާއި ބެހޭ ވަޒީރު އިބްރާހީމް ފައިސަލް ވިދާޅުވެއްޖެ އެވެ.
ފައިސަލް މިގޮތަށް ވިދާޅުވީ އިއްޔެ ބޭއްވި ޑެސްޓިނޭޝަން އައްޑޫ ސަމިޓްގައި ވާހަަކަދައްކަވަމުން ނެވެ.
މި ސަމިޓްގައި ވާހަކަދައްކަވަމުން ފައިސަލް ވިދާޅުވީ ޝަންގްރިއްލާ އަލުން ހުޅުވުމަށްޓަކައި ވަރަށް ބައިވަރު ރިނޮވޭޝަން މަސައްކަތްތައް ބޭނުންވާއިރު އެކަމަށް ވަރަށް ބައިވަރު ވަގުތު ބޭނުންވާނެ ކަމަށް ވިދާޅުވި އެވެ. އަދި ޝަންގްރިއްލާ އަލުން އޮޕަރޭޝަނަށް ގެނައުމަށް ވަރަށް ބޮޑު ހޭދައެއް ދާނެ ކަމަށް ފައިސަލް ވިދާޅުވި އެވެ.
”25 މިލިއަނެއްހާ ޑޮލަރު ހޭދަވާނެ ކަމެއް އެއީ. އެކަން ކުރުމަށް ޝަންގްރިއްލާގެ އޯނަރުންނާ ހަމައަށް ދިއުމަށް ނިންމައި، މީޓިންއަށް ދައުވަތު ދީފަ ވާނެ“
މީގެ އިތުރަށްވެސް، އައްޑޫ ސިޓީގެ އެންމެ ބޮޑު ރިސޯޓް ކަމަށްވާ ޝަންގްރިއްލާ ރިސޯޓް އެންޑް ސްޕާ އޮޕަރޭޝަނަލައިޒް ކުރުމަށްޓަކައި ސީދާ ބައިނަލްއަގްވާމީ ދަތުރުތައް އައްޑޫ ސިޓީއަށް ކުރަންޖެހޭ ކަމަށް މިނިސްޓަރު ވިދާޅުވެފައި ވެއެވެ.
މިނިސްޓަރު ފައިސަލް ދެއްކެވި ވާހަކަފުޅުގައި އައްޑޫ ސިޓީގެ ފަތުރުވެރިކަން ކުރިއެރުވުމަށް ކުރަންޖެހޭ ހާއްސަ މަސައްކަތްތަކުގެ މައްޗަށް އަލިއަޅުއްވާލެއްވި އެވެ. ޝަންގްރިއްލާ ރިސޯޓް އެންޑް ސްޕާ އަލުން ހުޅުވުމަކީ ރައީސް ޑރ. މުހައްމަދު މުއިއްޒުގެ މުހިންމު ރިޔާސީ ވައުދެއްކަން ފާހަގަކުރައްވައި، މި ވައުދު ފުއްދުމަށް މަސައްކަތްތައް ހީވާގިކަމާއެކު ކުރައްވަމުންދާކަން ފާހަގަކުރެއްވި އެވެ.
އެއާއެކު، ޝަންގްރިއްލާ ރިސޯޓް އެންޑް ސްޕާ އަލުން ހުޅުވުމުން ފުރިހަމަ ފައިދާއެއް ހޯދުމަށް އައްޑޫ ސިޓީއަށް ސީދާ ބައިނަލްއަގްވާމީ ދަތުރުތައް ވަރަށް މުހިންމު ކަމަށް މިނިސްޓަރު ފާހަގަކުރެއްވި އެވެ. ރާއްޖޭގެ އެންމެ ދެކުނުގެ ސިޓީއާ ސީދާ ގުޅުންތައް ގާއިމްކުރުމަށް ބައިނަލްއަގްވާމީ އެއާލައިންތަކާ އެކު މަޝްވަރާތައް ކުރިއަށްދާކަން އޭނާ ފާހަގަކުރެއްވި އެވެ.
ލަގްޒަރީ މިންގަނޑުތަކަށް މަޝްހޫރު ޝަންގްރިއްލާ ރިސޯޓުގައި 550،000 އަކަމީޓަރުގައި ފަތުރާފައިވާ 60 ވޯޓާ ވިލާއާއި 26 ބީޗް ވިލާއާއި 28 ޕޫލް ވިލާއާއި 16 ޓްރީ ހައުސް އަދި ދެ ޕްރެޒިޑެންޝަލް ވިލާ ހިމެނޭ ގޮތަށް 284 އެނދު ހުރެ އެވެ. މި ރިސޯޓް އަސްލު ހިންގަން ފެށީ ސަރުކާރުގެ 30 އިންސައްތަ ހިއްސާއާއި 70 އިންސައްތަ މިލްކުވެރިކަމާ އެކު ސަރުކާރާއެކު ޕްރޮޕަޓީ ބެލެހެއްޓުމަށް އުފައްދާފައިވާ ޖޮއިންޓް ވެންޗަރެއް ކަމަށްވާ އައްޑޫ އިންވެސްޓްމަންޓް ޕްރައިވެޓް ލިމިޓެޑުން ނެވެ. ނަމަވެސް ދު ކޯވިޑް-19 ބަލިމަޑުކަމުގެ ސަބަބުން ބަންދުކުރުމާ ގުޅިގެން 2023 ވަނަ އަހަރުގެ އޮގަސްޓް މަހު ސަރުކާރުން އެރިޒޯޓްގެ ހިއްސާ ދޫކޮށްލި އެވެ.
