ސަރުކާރާ ރައްޔިތުންނާ އޮންނަ ގުޅުން ވަރުގަދަ ކުރުމުގެ މަގްސަދުގައި އިނގުރައިދޫ ދާއިރާގެ މެންބަރު އިބްރާހިމް ފަލާހު ރ. އަތޮޅަށް ވަޑައިގެންފި އެވެ.
ފަލާހު ރ. އަތޮޅުގެ ބައެއް ރަށްރަށަށް ޒިޔާރަތްކުރެއްވުމަށް ދަތުރު ފެއްޓެވީ އިއްޔެގަ އެވެ. މި ދަތުރުގައި އޭނާއާއި އެއްކޮށް ޕީއެންސީގެ އިތުރު ދެ މެންބަރުންނެއްވެސް ބައިވެރިވެވަޑައިގަތް ކަމަށް ފަލާހު ”ޖަވިޔަނި“ އަށް މައުލޫމާތު ދެއްވި އެވެ. އެއީ މިލަންދޫ ދާއިރާގެ މެންބަރު ހަސަން މުފީދާއި ދިއްދޫ ދާއިރާގެ މެންބަރު އަބްދުލް ލަތީފެވެ.
”ޖަވިޔަނި“ އަށް މައުލޫމާތު ދެއްވަމުން ފަލާހު ވިދާޅުވީ މި ދަތުރަކީ ރައްޔިތުންގެ ހާލު ބެލުމުގެ ގޮތުން ކުރައްވާ ދަތުރެއް ކަމަށެވެ. ފަލާހު ވިދާޅުވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ރައްޔިތުންނާއި ގާތުން މަސައްކަތް ކުރައްވަން ބޭނުންފުޅުވާ ރައީސެއް ކަމުން އެމަނިކުފާނުވެސް 100 ވަރަކަށް ރަށްރަށަށް ވަޑައިގެން ރަށު ކައުންސިލުތަކާއި ބައްދަލުކުރެއްވި ކަމަށެވެ. އެހެން ވެރިކަންތަކުގައި ރައީސުންނާއި ބައްދަލުކުރައްވަން ކައުންސިލުން މާލެ ވަޑައިގަތް ނަމަވެސް ރައީސް އާއި ބައްދަލުކުރައްވަން އެޕޮއިންޓްމެންޓް ނުލިބޭކަން ޕީއެންސީގެ ޕީޖީ ލީޑަރު ފާހަގަކުރެއްވި އެވެ. ރައީސް އެ ދައްކަވާ މިސާލާއި އެެއްގޮތަށް ޕީއެންސީގެ މަޖިލީސް މެންބަރުން ރަށްރަށަށް ވަޑައިގެން ސަރުކާރާއި ރައްޔިތުންގެ މެދުގައި އޮންނަ ގުޅުން ވަރުގަދަކުރުމަށް ރައްޔިތުންނަށް ބޭނުންވާ ކަންކަން ދެނެގަންނަން މަސައްކަތްކުރަމުންދާ ކަމަށް ފަލާހު މައުލޫމާތު ދެއްވި އެވެ.
”ގިނަ ފަހަރެއްގައި އެހެން ރައީސުން ވެރިކަން ލިބުމުން، ރައްޔިތުންގެ ހާލު ބައްލަވަން ވަޑައިނުގަނޭ“
މީގެ އިތުރަށްވެސް، ފަލާހު ވިދާޅުވީ މި ދަތުރުގެ ތެރެއިން ޕީއެންސީއާއި ބައެއް އާންމުން ގުޅުމަށް މެންބާޝިޕް ފޯމް ހަވާލުކުރުމަށްވެސް ހަމަޖެހިފައިވާ ކަމަށެވެ. ފަލާހު ވިދާޅުވީ ރާއްޖޭގެ އެކި ކަންކޮޅުތަކުން ޕީއެންސީއާއި ގުޅޭ މެންބަރުން އިތުރުވަމުންދާ ކަމަށެވެ.
