ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިންޑިއާގެ ބޮޑު ވަޒީރު ނަރެންދުރަ މޯދީއަށް ތައުޒިޔާގެ މެސެޖެއް ފޮނުއްވައިފި އެވެ.
ކެރެލާ ސްޓޭޓްގެ ވަޔަނާޑް ޑިސްޓްރިކްޓްގައި ހިނގި ބިންހެލުމުގައި ސަތޭކައަށް ވުރެ ގިނަ މީހުންގެ ފުރާނަ ގެއްލި، އިތުރު އެތައް ބަޔަކު ޒަހަމްވިކަން އެނގިވަޑައިގަތުމުން ރައީސް ވަނީ އެކަމާއި ހިތާމަ ކުރައްވާ ކަމަށް ވިދާޅުވެފަ އެވެ. މި ކާރިސާގެ ސަބަބުން މީހުންގެ ފުރާނައާއި ދިރިއުޅުމުގެ ވަސީލަތްތަކަށް ލިބުނު ގެއްލުމަކީ ތަސައްވަރުވެސް ނުކުރެވޭ ފަދަ ހިތާމައެއްގެ ގޮތުގައި ރައީސް ސިފަކުރެއްވި އެވެ.
ރައީސުލްޖުމްހޫރިއްޔާގެ މެސެޖުގައި، ސަރުކާރާއި ދިވެހި ރައްޔިތުންގެ ނަމުގައި ތައުޒިޔާ ރައްދު ކުރެއްވި އެވެ. އަދި އެ ސަރަހައްދުގައި ކުރާ ސާޗް އެންޑް ރެސްކިއު މަސައްކަތްތައް ހަލުވިކަމާއެކު ކާމިޔާބުކަމާއެކު ހިންގޭނެ ކަމަށް އުންމީދު ކުރައްވާ ކަމަށް ވެސް ރައީސް ވިދާޅުވި އެވެ.
މެސެޖު ނިންމަވާލައްވަމުން، މި ކާރިސާގެ ވޭންދެނިވި ނަތީޖާތަކުން އަރައިގަތުމުގައި، ޝިކާރައަކަށް ވެފައިވާ މީހުންގެ އާއިލާތަކަށާއި، އެމީހުންގެ ލޯބިވާ މީހުންނާއި، އަދި އެކަމުގެ އަސަރު ކުރި އެންމެންނަށް ވެސް ކެތްތެރިކަން ލިބުމަށް އެދިވަޑައިގެންފައި ވެއެވެ.
ކެރެލާގެ އެ ސަރަހައްދަށް ބޯކޮށް ވާރޭވެހުމުގެ ސަބަބުން ދިމާވި މި ހާދިސާގައި ގިނަ ބަޔަކު ތާށިވެފައިވާއިރު މިހާރު އެސަރަހައްދަށް ރޭންޖްވެސް ނުލިބޭތީ މީހުން ސަލާމަތްކުރުމުގެ މަސައްކަތަށް ބުރޫއަރާފައިވާ ކަމަށް އިންޑިއާގެ ކަމާއި ބެހޭ އިދާރާތަކުން ރިޕޯޓްކޮށްފައި ވެއެވެ. މިހާރު އިންޑިއާގެ އަސްކަރިއްޔާއިން ވަނީ މީހުން ސަލާމަތް ކުރުމަށްޓަކައި ހެލިކޮޕްޓަރުތައް ބިންގަނޑު ކަހައިގެން ދިޔަ ސަރަހައްދަށް ފޮނުވާފަ އެވެ.
ޓީވީ ބްރޯޑްކާސްޓުން ދައްކާ ގޮތުގައި ހިލަތަކާއި ވެއްޓިފައިވާ ގަސްތަކުގެ ތެރެއިން ފެން ފައިބަމުން ދިޔައިރު ގިނަ ގެތަކެއް ވަނީ ސުންނާފަތިވެފަ އެވެ.
އިންޑިއާގައި ގަވާއިދުން ޖޫން މަހާއި ސެޕްޓެމްބަރު މަހާއި ދެމެދު ތަޖުރިބާކުރާ ވިއްސާރަ މޫސުމުގައި ބިންގަނޑު ކަހާއިގެން ދިއުމުގެ ހާދިސާތައް ކުރިމަތިވެ އެވެ.
