ކޯޓު އަމުރެއްގެ ދަށުން ފުލުހުން ވަތް އެޕާޓްމެންޓެއްގެ އެއްވެސް ފާހާނާއެއްގެ ދޮރު ވައްޓާލާފައިނުވާނެ ކަމަށް ބުނެ، މީޑިއާގައި ދެކެވޭ ވާހަކަތައް ފުލުހުން ދޮގުކޮށްފި އެވެ.
ފުލުހުން މިއަދު މައުލޫމާތުދިން ގޮތުގައި މަސްތުވާތަކެތީގެ މައްސަލައެއްގައި ހިތަދޫ އެޕާޓްމެންޓެއް އިއްޔެގެ ވަގުތެއްގައި ކޯޓު އަމުރެއްގެ ދަށުން ބަލާ ފާސްކޮށްފައިވެ އެވެ.
އެޕާޓްމެންޓަށް ފުލުހުން ވަނުމަށް ދޮރު ހުޅުވާލުމަށް ތަކުރާރުކޮށް އެދުމުންވެސް ދޮރު ނުހުޅުވުމުން އެ އެޕާޓްމެންޓަށް ފުލުހުން ވަދެފައިވަނީ ބާރުގެ ބޭނުންކޮށް ދޮރު ވައްޓާލައިގެންނެވެ. އަދި އެޕާޓްމެންޓްގެ ދެ ކޮޓަރިއެއްގެ ދޮރު ހުޅުވުމަށް ތަކުރާރުކޮށް އެދުމުންވެސް ދޮރު ނުހުޅުވުމުން ފުލުހުން އެކޮޓަރިއަށް ވަދެފައިވަނީވެސް ބާރުގެ ބޭނުންކޮށް ދޮރު ވައްޓާލައިގެންނެވެ. އޭގެ ތެރެއިން އެެއް ކޮޓަރީގައި ފެންވަރައިގެން ނުކުމެ ހުރި އަންހެނަކު ހުރުމުން ފުލުހުން ވާނީ ދޮރުލެއްޕުމަށްފަހު ކޮޓަރިން ނުކުތުމަށް ފުރުސަތު ދީފައި ކަމަށް ފުލުހުން ބުންޏެވެ.
”އެޕާޓްމެންޓްގެ އެއްވެސް ފާހާނާއެއްގެ ދޮރު ވައްޓާލާފަ ވަދެފައި ނުވާކަން ފާހަގަކުރަން. އަދި މި އޮޕަރޭޝަންގައި ހަރަކާތްތެރިވި ފުލުހުން ބޮޑީވޯން ކެމެރާ ބޭނުންކޮށްފައި ނުވާކަން މި ފުރުސަތުގައި ފާހަގަކޮށްލަން“
މީގެ އިތުރަށްވެސް ފުލުހުން ވަނީ މި އޮޕަރޭޝަން ހިންގުމުގައި ބާރުގެ ބޭނުން ކުރިގޮތުގެ ރިވިއު އެއް ހަމަޖެހިފައިވާ އުސޫލުތަކުގެ ތެރެއިން ކުރާނެ ވާހަކަވެސް ބުނެފަ އެވެ.
