ރާއްޖޭގެ ބޯޑަރުތަކުގެ ސަލާމަތީ ފިޔަވަޅުތައް ވަރުގަދަ ނޫން ކަމަށް މޯލްޑިވްސް ކަސްޓަމްސް ސާވިސް އިން ބުނެފި އެވެ.
ރައްޔިތުންގެ މަޖިލީހުގެ ސެކިއުރިޓީ ސާވިސަސް ކޮމިޓީ (241 ކޮމިޓީ)ގެ މިއަދުގެ ބައްދަލުވުމުގައި ވާހަކަ ދައްކަވަމުން އެންފޯސްމަންޓް އެންޑް ބޯޑާ ސެކިއުރިޓީގެ އިސްވެރިޔާ އެސިސްޓެންޓް ކޮމިޝަނަރު އޮފް ކަސްޓަމްސް އިސްމާއިލް ހަމްދޫން ވިދާޅުވީ ކަސްޓަމްސްއަށް ކުރިމަތިވެފައިވާ އެންމެ ބޮޑު ގޮންޖެހުމަކީ ރާއްޖޭގެ ކަނޑުގެ ސަރަހައްދު ރަނގަޅަށް މޮނިޓަރ ކުރުމުގެ ގާބިލްކަން ނެތުން ކަމަށެވެ.
ހަމްދޫން ވިދާޅުވީ، މިވަގުތު ކަސްޓަމްސް އޮފިސަރުން ބަނދަރުތަކުގައި ބަހައްޓަމުންދާ ކަމަށާއި، ރާއްޖެ އަންނަ އުޅަނދުފަހަރު ބަނދަރުތަކަށް ދިއުމުގެ ކުރިން ބޭނުން ގޮތަކަށް ކަންތައް ކުރުމަށް ހުޅުވާލެވިފައިވާ ކަމަށެވެ.
އޭނާ ފާހަގަކުރެއްވި ގޮތުގައި ފުލުހުން ވެސް އެފަދަ އުޅަނދުތަކުން ގަވާއިދާ ހިލާފަށް މަސްތުވާތަކެތި ލޯކަލް އުޅަނދުތަކަށް ބަދަލުކުރާ މައްސަލައިގެ ތަހުގީގުތައް ހިންގާފައިވާއިރު، އެ އުޅަނދުތަކުން އެ މަސްތުވާތަކެތި ނަގައިގެން މީހުން ނޫޅޭ ރަށްރަށުގައި ފޮރުވާ ކަމަށެވެ.
ހަމްދޫން ފާހަގަކުރެއްވި ގޮތުގައި މިގޮތަށް އެތެރެކުރެވޭނީ ހަމައެކަނި މަސްތުވާތަކެތި ނޫނެވެ. މިސާލަކަށް ރާއްޖެއަށް ހަތިޔާރު ގެންނަން އަދި އެއްވެސް މީހަކު ނުނިންމި ނަމަވެސް އެކަމަކު އެކަން ކޮށްފިނަމަ އެކަން ކުރުމުގެ މަގު ހުޅުވިފައި އެބައޮތް ކަމަށް ހަމްދޫން ވިދާޅުވި އެވެ.
ބަނދަރުތަކަށް ގެންނަ ސިނގިރޭޓާއި މަސްތުވާތަކެއްޗާއި އެފަދަ އެހެން ތަކެތި އަތުލައިގަނެފައިވާކަން އޭނާ ފާހަގަކުރެއްވި އެވެ. ނަމަވެސް ރާއްޖެއަށް ގަވާއިދާ ހިލާފަށް ކޮންމެ މުދަލެއް ގެނައުމުގެ ފުރުސަތުވެސް މިވަގުތު އެބައޮތް ކަމަށް އޭނާ ވިދާޅުވި އެވެ. އަދި އެފަދަ ތަކެތި ބަނދަރުތަކަށް ނުފޯރާ ގޮތަށް އެހެން ސަރަހައްދުތަކަށް އެތެރެކުރުމުގެ ފުރުސަތުތައް ބަންދުކުރުމަކީ ވަރަށް މުހިންމު ކަމެއް ކަމަށް ވެސް އޭނާ ވިދާޅުވި އެވެ.
ހަމްދޫން ވިދާޅުވީ، ރާއްޖެ އިން ވެސް، ބޮޑެތި ކަނޑުގެ ސަރަހައްދުތައް ހުންނަ އެހެން ގައުމުތަކުން ބޭނުންކުރާ ނިޒާމުތައް ގެންގުޅެން ޖެހޭ ކަމަށެވެ. މި ގައުމުތައް ވަރަށް ބޮޑަށް ބަރޯސާވެފައިވަނީ ވައިގެ ސަވައިލެންސަށް ކަމަށާއި، ރާއްޖެއިންވެސް މިކަމަށް ޑްރޯން ބޭނުންކުރަން ފަށަން ޖެހޭ ކަމަށް ވިދާޅުވި އެވެ.
ބޯޑަރު ސަވައިލެންސް އަށް ރާއްޖެ އަށް ޑްރޯން ފޯރުކޮށްދިނުމަށް އެމެރިކާ އާއި ޗައިނާ އެއްބަސްވެފައިވާ ކަމަށް ކޮމިޝަނާ ޖެނެރަލް އޮފް ކަސްޓަމްސް ޔޫސުފް މާނިއު މުހައްމަދު މިއަދު ވިދާޅުވެފައި ވެއެވެ. އޭނާ ވިދާޅުވީ މި ޑްރޯންތައް އޮޕަރޭޓްކުރާނީ މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ އެއާކޯޕްސް އިން ކަމަށެވެ.
