ފިޗުން ރާއްޖޭގެ ’ސީސީ‘ ރޭޓިން ދަމަހައްޓައިފި

Advertisement

އެންމެ ފަސް

Advertisement

ކްރެޑިޓް ރޭޓިން އެޖެންސީ ފިޗުން ވެސް ރާއްޖެއަށް ދީފައި އޮތް ’ސީސީ‘ ރޭޓިން މިއަދު ދަމަހައްޓައިފި އެވެ.

ފިޗުން ރާއްޖޭގެ ރޭޓިން ސީސީއަށް ދަށްކުރީ މިދިޔަ އޮގަސްޓުގަ އެވެ. ’ސީސީ‘ ރޭޓިންއަކީ ދަރަނި ނުދެއްކި ބަނގުރޫޓުވެދާނެކަމުގެ ބިރު ބޮޑުވުމުންދޭ ރޭޓިންއެކެވެ.

ފިޗުން އެންމެ ކަންބޮޑުވުމާއެކު ފާހަގަކޮށްފައިވަނީ މި އަހަރާއި އަންނަ އަހަރު ރާއްޖެއިން ދައްކަންޖެހޭ ބޮޑު ދަރަންޏެވެ. އެގޮތުން މި އަހަރު 688 މިލިއަން ޑޮލަރު ދައްކަން ޖެހޭއިރު، އަންނަ އަހަރު އެ އަދަދު 1.1 ބިލިއަން ޑޮލަރަށް އަރާނެކަން ފިޗުން ފާހަގަކޮށްފައިވެ އެވެ.

ފިޗުގެ ރިޕޯޓުގައި ފާހަގަކޮށްފައިވާ ގޮތުގައި، ރާއްޖޭގެ ބޭރު ފައިސާގެ ރިޒާވްގައި މިހާރު ހުރީ 1.5 މަސްދުވަހުގެ ބޭރުގެ ދަރަނި އަދާކުރެވޭވަރުގެ އަދަދެކެވެ. މިއީ އިންޓަނޭޝަނަލް މަނިޓަރީ ފަންޑުން (އައިއެމްއެފް) ކަނޑައަޅާފައިވާ މެދުމިންވަރު ކަމަށްވާ 3.5 މަހަށްވުރެ ދަށް އަދަދެކެވެ.

މި ހާލަތުގައި، ބޭރުގެ ދަރަނި އަދާކުރުމަށް ރާއްޖެއިން ބޭރުގެ އެކި ފަރާތްތަކުގެ އެހީތެރިކަން ބޭނުންވާނެކަމަށް ފިޗުން ވަނީ ފާހަގަކޮށްފަ އެވެ. އަދި މިކަމަށް ހައްލެއް ހޯދުމަށްޓަކައި ސަރުކާރުގެ ޚަރަދުތައް އިތުރަށް ދަށްކުރުމަށް ވެސް ފިޗުން ވަނީ ލަފާދީފަ އެވެ.

ފިނޭންސްއިން ބުނީ ސީސީގައި ރޭޓިން ހިފެހެއްޓުނީ ސަރުކާރުގެ ހަރަދުނާ ފިޔަވަޅުތަކުގެ ސަބަބުންކަމަށް!

ރާއްޖޭގެ ކްރެޑިޓް ރޭޓިން ”ސީސީ“ ގައި ދެމެހެއްޓުމަށް ފިޗުން ނިންމުމުން ފިނޭންސް މިނިސްޓްރީން ނެރުނު ބަޔާނެއްގައި ބުނި ގޮތުގައި މިއީ ފަތުރުވެރިކަމުގެ ދާއިރާގެ ހަރުދަނާކަމާއި، ފައިސާއާ ގުޅޭ އިސްލާހުތަކާ ގުޅިގެން ބޭރު ފައިސާގެ ރިޒަރވް އިތުރުވެފައިވުމުގެ ސަބަބުން ފިޗުން ނިންމި ނިންމުމެއް ކަމަށެވެ.

ފިނޭންސް އިން މި ރޭޓިންގ ދެމެހެއްޓުން ފާހަގަކޮށްފައިވަނީ ރަނގަޅު ފިޔަަވަޅެއްގެ ގޮތުގަ އެވެ. އެގޮތުން ފިނޭންސް މިނިސްޓްރީގެ ބަޔާނުގައި ފާހަގަކޮށްފައިވާ ގޮތުގައި، އިންޑިއާގެ ރިޒަރވް ބޭންކާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާ ދެމެދު ހެދިފައިވާ ކަރަންސީ ސްވޮޕް ފެސިލިޓީ ހަރުދަނާ ގޮތެއްގައި ބޭނުންކުރެވިފައިވެ އެވެ. އަދި މި އަހަރުގެ ޖޫން 10 ގެ ނިޔަލަށް، ފަތުރުވެރިންގެ އަދަދު އަހަރުން އަހަރަށް 9.4 އިންސައްތަ އިތުރުވެފައިވާކަން ފާހަގަކޮށްފައިވެ އެވެ.

ފިޗްއިން ލަފާކުރާ ގޮތުގައި މި އަހަރު ޤައުމީ އުފެއްދުންތެރިކަމުގެ (ޖީޑީޕީ) ކުރިއެރުން 4.8 އިންސައްތައަށް އަރާނެ އެވެ. ނަމަވެސް ވެލާނާ އިންޓަރނޭޝަނަލް އެއަރޕޯޓް ހިންގަން ފެށުމާއެކު، އަންނަ އަހަރު ޖީޑީޕީގެ ކުރިއެރުން 6.0 އިންސައްތައަށް އަރާނެކަމަށް ލަފާކުރެވޭކަމަށް ފިނޭންސް އިން ބުނެފައިވެ އެވެ. އެހެންކަމުން އެއީވެސް ރޭޓިން ”ސީސސީ“ ގަައި ހިފެހެއްޓުނު ސަބަބެއް ކަމަށް ފިނޭންސްގެ ބަޔާނުގައި ފާހަގަކޮށްފައިވެ އެވެ.

ޖޫން 5 އާ ހަމައަށް، އޯވަރޯލް ފިސްކަލް ސަރޕްލަސް 1.1 ބިލިއަން ރުފިޔާގައި ހުރިކަން ފިޗުން ފާހަގަކޮށްފައިވާކަމަށް ފިނޭންސް އިން ބުނެފައިވަނީ މިއީ އާމްދަނީ ރަނގަޅުވެ، ހަރުދަނާ ބަޖެޓު ކޮންޓްރޯލްތަކެއްގެ ތެރެއިން ޚަރަދުތައް އެކަށީގެންވާ މިންވަރަކަށް ގެނައުމުގެ ސަބަބުންނެވެ. އަދި އޭޕްރީލްގެ ނިޔަލަށް ދައުލަތުގެ ރަސްމީ ރިޒަރވް 856.3 މިލިއަން އެމެރިކާ ޑޮލަރަށް އަރާފައިވާކަމަށް ފިނޭންސް މިނިސްޓްރީން ހާމަކޮށްފައިވެ އެވެ. އަދި މެދުރާސްތާގައި ބޭރު ފައިސާގެ ރިޒާވް ދެމެހެއްޓެނިވި ގޮތެއްގައި އިތުރުވާނެކަމަށް ބެލެވޭކަމަށްވެސް ފިނޭންސް އިން ބުންޏެވެ.

މީގެކުރިން ކްރެޑިޓް ރޭޓިން އެޖެންސީ މޫޑީސް އިންވެސް ވަނީ ރާއްޖެއަށް ދީފައިވާ ކްރެޑިޓް ރޭޓިންވެސް ދެމެހެއްޓުމަށް ނިންމައިފަ އެވެ.

ކްރެޑިޓް ރޭޓިންގްސް މިނިސްޓްރީ އޮފް ފިނޭންސް

Leave a Reply

Your email address will not be published. Required fields are marked *

ހަބަރާއި ގުޅޭ