އިންޑިޔާއިން ރާއްޖެ އައި ފަތުރުވެރިންގެ އަދަދު 100،000 އަށް އަރައިފި ކަމަށް ފަތުރުވެރިކަމާއި ބެހޭ ވުޒާރާއިން ނެރުނު އެންމެ ފަހުގެ ތަފާސް ހިސާބުން ދައްކައިފި އެވެ.
ޓޫރިޒަމް މިނިސްޓްރީން އާންމުކުރި އެންމެ ފަހުގެ ޑެއިލީ އަޕްޑޭޓްސް ރިޕޯޓުގައިވާ ގޮތުން އިންޑިއާއިން ޖުމްލަ 103،438 ފަތުރުވެރިން ރާއްޖެއަށް ޒިޔާރަތްކޮށްފައިވެ އެވެ. މިއާއެކު އިންޑިއާ އޮތީ ރާއްޖޭގެ ފަތުރުވެރިކަމުގެ ހަވަނައަށް އެންމެ ބޮޑު މާކެޓުގެ ގޮތުގަ އެވެ.
މިދިޔަ އަހަރު އިންޑިއާއަކީ ރާއްޖޭގެ ޓޫރިޒަމްގެ އެއްވަނަ މާކެޓްގައި ދެލައްކައަށް ވުރެ ގިނަ ފަތުރުވެރިން އައިސްފައިވާ ގައުމެވެ. އިންޑިއާއިން އަންނަ ފަތުރުވެރިން އިތުރުކުރުމަށް ސަރުކާރުން އަންނަނީ އެކި މަސައްކަތްތަކެއް ކުރަމުން ނެވެ. މީގެ ތެރޭގައި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ޖުލައި މަހު އިންޑިއާގެ ތިން ސިޓީއެއްގައި ބޭއްވި ”ވެލްކަމް އިންޑިއާ“ އިވެންޓް ހިމެނެ އެވެ.
މީގެ އިތުރުން، ރައީސް ޑރ. މުޙައްމަދު މުޢިއްޒު، އެންމެފަހުން އިންޑިއާއަށް ކުރެއްވި ދަތުރުފުޅުގައި، ރާއްްޖޭގެ ފަތުރުވެރިކަމުގެ ސިނާއަތް ކުރިއެރުވުމުގެ މަސައްކަތްވެސް ކުރެއްވި އެވެ. މުމްބާއީގައި ބޭއްވި ޓޫރިޒަމްގެ ހާއްސަ އިވެންޓެއްގައި ބައިވެރިވެވަޑައިގެން، ބޮލީވުޑްގެ ބައެއް ތަރިންނާއި އިންޑިއާގެ ފިލްމް ޕްރޮޑަކްޝަން އިންޑަސްޓްރީގައި ހަރަކާތްތެރިވާ ފަންނާނުންނާއި ބައްދަލުކުރެއްވި އެވެ.
އެންމެ ފަހުގެ ތަފާސް ހިސާބުތަކުން ދައްކާ ގޮތުގައި، މިއަހަރުގެ މިހާތަނަށް ޖުމްލަ 1،693،952 ފަތުރުވެރިން ރާއްޖެއަށް ޒިޔާރަތްކޮށްފައިވެ އެވެ. މިއީ މިދިޔަ އަހަރާ އަޅާބަލާއިރު 9.5 އިންސައްތައިގެ ކުރިއެރުމެކެވެ. ސަރުކާރުގެ އަމާޒަކީ އަހަރު ނިމޭއިރު މަދުވެގެން ދެ މިލިއަން ފަތުރުވެރިން ރާއްޖެއަށް އައުމެވެ. ޓޫރިޒަމް މިނިސްޓްރީން ލަފާކުރާ ގޮތުގައި ޑިސެމްބަރު މަހުގެ ތެރޭގައި މި އަމާޒު ހާސިލުކުރެވޭނެ އެވެ.
