ބޭންކިން ނިޒާމުގައި ދައުރުވާ އިތުރު ފައިސާ މަދުކުރުމުގެ މަގުސަދުގައި ނޮވެމްބަރު މަހު ފެށުމަށް ހަމަޖެހިފައިވާ އޯޕަން މާކެޓް އޮޕަރޭޝަނެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަހުމަދު މުނައްވަރު އިއުލާން ކުރައްވައިފި އެވެ.
އޭނާ ހާމަކުރެއްވި ގޮތުގައި އެމްއެމްއޭގެ ބޯޑުން މި މަސައްކަތް ފާސްކޮށްފައިވަނީ ސާޕްލަސް ލިކުއިޑިޓީ އަށް ހައްލެއް ހޯދުމަށެވެ.
އެމްއެމްއޭއިން ބުނާ ގޮތުގައި ކުރީގެ ސަރުކާރުން ތިން އަހަރު ދުވަހުގެ ތެރޭގައި ގާތްގަނޑަކަށް 534 މިލިއަން ޑޮލަރުގެ އަގުހުރި ރުފިޔާ ޗާޕްކޮށްފައި ވާއިރު، މިއީ އޭގެ ކުރީ 40 އަހަރު ޗާޕްކުރި އަދަދަށް ވުރެ މާ ބޮޑު އަދަދެކެވެ. މި ގޮތަށް ފައިސާ ޗާޕުކުރުމުގެ ސަބަބުން އިގްތިސާދަށް ނޭދެވޭ އަސަރުތަކެއް ކޮށްފައިވާ ކަމަށް އިގްތިސާދީ މާހިރުން އިންޒާރު ދެއެވެ.
ގަވަރުނަރު މުނައްވަރު ވިދާޅުވީ އެމްއެމްއޭގެ މަގުސަދަކީ މިގޮތަށް ޗާޕުކުރި ފައިސާގެ ސަޕްލައި މަދުކުރުން ކަމަށެވެ. އެމްއެމްއޭގެ އަމަލުތަކުގެ ސަބަބުން ސަރުކާރުގެ ކޭޝްފްލޯއަށް އަސަރުކޮށްފާނެ ކަމަށް ގަބޫލުކުރެއްވި ނަމަވެސް، ތަޖުރިބާކާރުންގެ ލަފާގެ ސަބަބުން މި ފިޔަވަޅު އެޅުމުގެ މުހިންމުކަމަށް ތާއީދުކުރާ ކަމަށް އޭނާ ފާހަގަކުރެއްވި އެވެ.
ބޭންކިން ނިޒާމުގެ ތެރޭގައި ފައިސާގެ ސަޕްލައި އިތުރުވުމަކީ 2020 ވަނަ އަހަރާއި 2021 ވަނަ އަހަރު ކޯވިޑް-19 ގެ ސަބަބުން ކުރިމަތިވި އިގްތިސާދީ ގޮންޖެހުންތަކާއި ގުޅިގެން ކުރީ ސަރުކާރުން ކުރި މަސައްކަތެކެވެ.ް ނަމަވެސް 2022 ވަނަ އަހަރާއި 2021 ވަނަ އަހަރު އިގްތިސާދު ރަނގަޅުވާން ފެށިއިރު ވެސް އެ ސަރުކާރުން ފައިސާ ޗާޕް ކުރަމުން ދިޔަ އެވެ. 2023 ވަނަ އަހަރު ބާޒާރުގައި ބޭރު ފައިސާއަށް އޮތް ޑިމާންޑް އިތުރުވެގެން ދިޔަ އެވެ.
މިއީ ނިމިދިޔަ ވެރިކަމުގެ ފަހުކޮޅު ރާއްޖޭގެ އިގްތިސާދު ހީނަރުވުމުގެ މުހިންމު ސަބަބެއް ކަމަށް އިގްތިސާދީ މާހިރުން ވިދާޅުވެ އެވެ. އިގްތިސާދީ މާހިރުން އިންޒާރު ދޭ ގޮތުގައި މިފަދަ ކަންކަމަކީ ރާއްޖެ ފަދަ ކުޑަ އިގްތިސާދަކަށް ވަކިން ނުރައްކާތެރި ކަންތައްތަކެކެވެ.
