މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ޖަޕާނުގައި ފަތުރުވެރިކަން އިޝްތިހާރު ކުރުމަށް ޖަޕާނުގެ ”ޓީވީއާ“ އާއި އެކީގައި މަސައްކަތް ކުރަން ފަށައިފި އެވެ.

ޖަޕާނުގެ އެންމެ މަޝްހޫރު އެއް ޓީވީ ޕްލެޓްފޯމް މެދުވެރިކޮށް ކުރިއަށް ގެންދާ މި ކެމްޕޭން ފެށުމަށް ހަމަޖެހިފައިވަނީ  އޮގަސްޓް މަހުގެ އެއްވަނަ ދުވަހުން ފެށިގެން 29 ވަނަ ދުވަހުގެ ނިޔަލަށެވެ.

ޓީވީއާ އަކީ ޖަޕާނުގެ އެޑް ސަޕޯޓްޑް ވީޑިއޯ އޮން ޑިމާންޑް (އޭވީއޯޑީ) ނެޓްވޯކެކެވެ. މިއީ ޓޯކިޔޯގެ މައިގަނޑު ފަސް ވިޔަފާރި ބްރޯޑްކާސްޓަރުން 2015 ވަނަ އަހަރުގެ އޮކްޓޯބަރު މަހު ތައާރަފްކުރި ނެޓްވޯކެކެވެ.

”އަލްޓިމޭޓް ޓްރެވަލް މަންޒިލެއްގެ ގޮތުގައި ރާއްޖެއިން މި ކެމްޕޭންގެ ތެރޭގައި ލަގްޒަރީ، ދެމަފިރިންނާއި، ކަނޑުއަޑީގައި، އަދި އާއިލާތަކަށް ބޭނުންވާ ކެމްޕޭނެއް ދައްކާލާނެ“ ކަމަށް އެމްއެމްޕީއާރުސީން އިތުރަށް ބުނެފައިވެ އެވެ.

ވިޒިޓް މޯލްޑިވްސް ބްރޭންޑްގެ ދަށުން އެމްއެމްޕީއާރުސީން ވަނީ މިއަހަރު ޖަޕާނުގެ މާކެޓަށް އަމާޒުކޮށްގެން ފަތުރުވެރިކަން ޕްރޮމޯޓް ކުރުމުގެ އިތުރު ބައެއް ހަރަކާތްތައް ހިންގާފަ އެވެ،

ކުރިއަށް އޮތް އިވެންޓްތަކުގެ ތެރޭގައި ޓޮޕް ޓުއާ އޮޕަރޭޓަރުންނާ އެކު ޖޮއިންޓް ޕްރޮމޯޝަނެއް އަދި ޑިޖިޓަލް ކެމްޕޭންތައް ހިމެނެ އެވެ. މީގެ އިތުރުން ޖަޕާން ޓްރެވަލް އެންޑް ޓޫރިޒަމް އެސޯސިއޭޝަން، ޖަޕާން އެސޯސިއޭޝަން އޮފް ޓްރެވަލް އޭޖެންޓްސް (ޖާޓާ) އަދި ޖަޕާން ނޭޝަނަލް ޓޫރިޒަމް އޮގަނައިޒޭޝަން (ޖޭއެންޓީއޯ) އިން އިންތިޒާމްކުރާ ޓޫރިޒަމް އެކްސްޕޯ ޖަޕާން 2024 ގައި ވެސް އެމްއެމްޕީއާރުސީން ވަނީ އިންޑަސްޓްރީގެ ބައިވެރިންނާ އެކު މައުރަޒު ދައްކާލާފަ އެވެ.

ރާއްޖެއަށް ޖަޕާނުން އަންނަ ޓޫރިސްޓް މާކެޓް މިވަގުތު އޮތީ 15 ވަނައިގަ އެވެ. މި އަހަރުގެ މެއި މަހުގެ ނިޔަލަށް ޖުމްލަ 13،517 ޖަޕާން މީހުން ރާއްޖެ އައިސްފައިވާއިރު އެއީ ރާއްޖެ އަންނަ ފަތުރުވެރިންގެ މާކެޓް 1.5 އިންސައްތަ  ހިއްސާއެކެވެ.

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ފަތުރުވެރިކަން