ތޫފާން ”ޑިޓުވާ“ ދަތުރުކުރަމުންދަނީ ރާއްޖެއާ ދުރަށް ކަމަށާއި ނަމަވެސް ކުރިއަށް އޮތް 24 ގަޑިއިރުވެސް ރާއްޖޭގެ އެކި ހިސާބުތަކަށް ވިއްސާރަކުރާނެ ކަމަށް މޯލްޑިވްސް މީޓިއޮރޮލޮޖިކަލް ސަރވިސް (މެޓް އޮފީސް) އިން ބުނެފި އެވެ.
މެޓް އޮފީހުން މިއަދު ބުނެފައިވަނީ، ”ޑިޓުވާ“ ތޫފާން މިހާރު ހުރީ ހއ. ތުރާކުނުގެ އިރުއުތުރުން ގާތްގަނޑަކަށް 875 ކިލޯމީޓަރު ދުރުން، ސްރީލަންކާގެ އުތުރު އައްސޭރިފަށާއި ބޭ އޮފް ބެންގާލްގެ ހުޅަނގު ދެކުނު ސަރަހައްދުގައި ކަމަށެވެ.
”މި ތޫފާން ދަތުރު ކުރާނެ ކަމަށް ލަފާކުރެވެނީ އުތުރުހުޅަނގުއުތުރަށް، ރާއްޖެއާއި ދުރަށެވެ.“ މެޓް އޮފީހުން ބުނެފައިވެ އެވެ.
މި ތޫފާނާއި ގުޅިގެން ކުރިއަށް އޮތް 24 ގަޑިއިރުވެސް، މެދުރާއްޖެތެރޭގެ އެކި ހިސާބުތަކަށާއި ދެކުނުގެ ބައެއް އަތޮޅުތަކަށް ވިއްސާރަކުރުމާއެކު ގުގުރާނެ ކަމަށް ލަފާކުރެވޭ ކަމަށް މެޓް އޮފީހުން މައުލޫމާތުދީފައިވެ އެވެ.
މެޓް އޮފީހުން ބުނެފައިވަނީ މާދަމާ ހެނދުނުގެ ވަގުތެއްގައި މި ތޫފާން އިންޑިއާގެ އުތުރު ޓަމިލްނާޑޫ، ޕޫޑޫޗެރީ އަދި އަންދްރަޕްރަދޭޝްގެ ދެކުނު އައްސޭރިފަށަށް ޖެހޭނެ ކަމަށް ލަފާކުރެވޭ ކަމަށެވެ.
މީގެކުރިން މެޓް އޮފީހުން ބުނެފައިވަނީ ތޫފާނާއި ގުޅިގެން ކުރަމުންދާ ވިއްސާރައިން އަލިވާނެ ކަމަށް ލަފާކުރެވެނީ އަންނަ އަންގާރަ ދުވަހުން ފެށިގެން ކަމަށެވެ.
