ސަރުކާރުގެ ފޯކްސަހުރީ ޒިންމާދާރުކަމާއެކު ރާއްޖޭގެ ދަރަނި މެނޭޖްކޮށް، ޤައުމަށް ދެމެހެއްޓެނިވި ކުރިއެރުން ހޯދުމަށްކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެ އެވެ.

މިނިސްޓަރ މިފަދައިން ވިދާޅުވީ މޫޑީޒް ރޭޓިންގސް އިން ދިވެހިރާއްޖޭގެ ކްރެޑިޓް ރޭޓިންގގެ އައުޓްލުކް ”ނެގެޓިވް“ އިން ”ސްޓޭބަލް“ އަށް މަތިކުރުމާއި ގުޅިގެންނެވެ.

މޫޑީޒްގެ މި ނިންމުމަކީ ރާއްޖޭގެ މާލީ ހާލަތު ރަނގަޅުވަމުންދާކަން ދައްކުވައިދޭ ނިންމުމެއް ނަމަވެސް، ރާއްޖޭގެ ކްރެޑިޓް ރޭޓިންގ ކަމަށްވާ ސީއޭއޭ-2 ވަނީ ހަމަ އެގޮތުގައި ދަމަހައްޓާފަ އެވެ. މޫޑީޒް އިން ފާހަގަކުރާ ގޮތުގައި ރާއްޖޭގެ ދަރަނީގެ މިންވަރު އަދިވެސް ހުރީ ވަރަށް މަތީގަ އެވެ.

މިނިސްޓަރ މޫސާ ޒަމީރު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެ ޒަޢާމަތުގައި، ބޭރުގެ ލިކުއިޑިޓީ ރަނގަޅުކޮށް، ޑޮލަރުގެ އާމްދަނީ އިތުރުކޮށް، ސޮވަރިން ޑިވެލޮޕްމަންޓް ފަންޑް (އެސްޑީއެފް) ހަރުދަނާކޮށް، ބަޖެޓް ހިންގުން ހަރުދަނާކުރެވިފައިވާ ކަމަށެވެ. މިފަދަ ހަރުދަނާ ސިޔާސަތުތަކުގެ ސަބަބުން ބޭރުގެ ފިއްތުންތައް ކުޑަވެ، ރާއްޖޭގެ އިޤްތިޞާދީ ކުރިއެރުމަށް އޮތް އިތުބާރު އަލުން އިއާދަވެގެން ހިނގައްޖެ ކަމަށް މިނިސްޓަރ ވިދާޅުވި އެވެ.

މިނިސްޓަރ ޒަމީރު އިތުރަށް ވިދާޅުވީ، ސަރުކާރުގެ މައިގަނޑު ފޯކަސް އަކީ ފިސްކަލް ކޮންސޮލިޑޭޝަން، ޒިންމާދާރުކަމާއެކު ދަރަނި މެނޭޖްކުރުމާއި، ދެމެހެއްޓެނިވި ގޮތެއްގައި ރާއްޖޭގެ ތަރައްޤީ ކުރިއެރުވުން ކަމަށެވެ.

ފިނޭންސް މިނިސްޓްރީން ބުނި ގޮތުގައި މޫޑީޒްގެ މި ނިންމުމަކީ ފާއިތުވި އަހަރުގެ ތެރޭގައި ރާއްޖެއިން ގެންގުޅެފައިވާ ހަރުދަނާ މާލީ ސިޔާސަތުތަކާއި، އަޅާފައިވާ ފިޔަވަޅުތަކުގެ ނަތީޖާ ރަނގަޅުކަމުގެ ހެއްކެކެވެ. އަދި ރާއްޖޭގެ ދަރަނި ދެއްކުމުގެ ޤާބިލުކަން އިތުރުކުރުމަށް ރޭވުންތެރިކަމާއެކު ކުރަމުން އަންނަ މަސައްކަތްތަކުގެ ނަތީޖާވެސް މިކަމުން ދައްކުވައިދޭކަމަށް މިނިސްޓްރީން ފާހަގަކުރެ އެވެ.

ދަރަނި އަދާކުރުމާއި ގުޅޭގޮތުން ފިނޭންސް މިނިސްޓްރީން ޔަގީންކަން ދީފައިވާ ގޮތުގައި، 2026 ވަނަ އަހަރު މެޗުއަރވާ 500 މިލިއަން އެމެރިކާ ޑޮލަރުގެ ސުކޫކު އަދި އެހެނިހެން ދަރަނި އަދާކުރުމަށް ވަނީ ރޭވިފަ އެވެ. ދަރަނި ޑިފޯލްޓްނުވެ، އެ މުއްދަތަށް ދަރަނި ދެއްކޭނެކަމުގެ ޔަގީންކަން ސަރުކާރުން ދެ އެވެ.

މޫޑީޒްއިން ނެރުނު ބަޔާނުގައި، ރޭޓިންގ އަށް މި ލިބުނު ކުރިއެރުމުގެ މައިގަނޑު ސަބަބަކީ ރާއްޖޭގެ ފިސްކަލް އަދި މަނިޓަރީ ސިޔާސަތުތަކުގެ ނަތީޖާއެއްގެ ގޮތުން ރާއްޖޭގެ މެކްރޮފިސްކަލް ހާލަތު ރަނގަޅުވުންކަމަށް ބުނެފައިވެ އެވެ. އެގޮތުން ބޭރު ފައިސާގެ އާމްދަނީ އިތުރުވެ، ސޮވްރިން ޑިވެލޮޕްމަންޓް ފަންޑުގައި ބޭރު ފައިސާގެ އަދަދުވެސް އިތުރުވެފައިވާކަން ފާހަގަކޮށްފައިވެ އެވެ. އެގޮތުން މޫޑީސް އިން ފާހަގަކޮށްފައިވާ ގޮތުގައި؛ 

• ބޭރު ފައިސާގެ ހާލަތު ރަނގަޅުވުން:

  • ބޭރު ފައިސާގެ އާމްދަނީ އިތުރުކުރުމަށް އެއަރޕޯޓް ޓެކުހާއި ފީ، ގްރީން ޓެކްސް އަދި ޓީޖީއެސްޓީގެ ރޭޓުތައް މުރާޖައާކުރުން.

  • ބޭރު ފައިސާގެ ޤާނޫނާއި ގަވާއިދު ތަންފީޒުކުރުން.

  • މިކަމުގެ ސަބަބުން ރަސްމީ ރިޒަރވް އަދި ބޭރު ފައިސާގެ ލިކުއިޑިޓީ ވަނީ ރަނގަޅުވެފައި.

• މި ސިޔާސަތުތަކާއެކު، މި މަހުގެ 9 ވަނަ ދުވަހުގެ ނިޔަލަށް ސޮވްރިން ޑިވެލޮޕްމަންޓް ފަންޑު (އެސްޑީއެފް) ގެ ބޭރު ފައިސާގެ ކޭޝް ބެލެންސް 126 މިލިއަން އެމެރިކާ ޑޮލަރަށް އިތުރުވެފައިވާކަން މޫޑީޒްއިން ފާހަގަކުރެ.

• ސަރުކާރުން ބަޖެޓު ތަންފީޒުކުރުމުގައި، ޚަރަދުތައް ކޮންޓްރޯލްކޮށް އަދި މި އަހަރުގެ ބަޖެޓް ޑެފިސިޓް ކުޑަކުރުމަށް ކޮށްފައިވާ މަސައްކަތްތައްވެސް މޫޑީޒްއިން ފާހަގަކޮށްފައިވޭ.

ފިނޭންސް އިން ބުނި ގޮތުގައި އިޤްތިސާދު ކުރިއެރުވުމުގައި ސަރުކާރަށް ވަނީ ރަނގަޅު ކާމިޔާބުތަކެއް ހާސިލްކުރެވިފަ އެވެ. އެގޮތުން ރާއްޖޭގެ އިޤްތިޞާދުގައި އެންމެ ބޮޑު ހިއްސާއެއް އަދާކުރާ ދާއިރާ ކަމުގައިވާ ފަތުރުވެރިކަމުގެ ސިނާއަތަށް ބަލާއިރު، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު ފާއިތުވި އަހަރުގެ މި މުއްދަތާ އަޅާބަލައި 10 އިންސައްތައިން ވަނީ އިތުރުވެފައިކަން މިނިސްޓްރީން ފާހަގަކުރި އެވ ހަމަ އެހެންމެ، މިއަހަރުގެ ސެޕްޓެމްބަރު މަހުގެ ނިޔަލަށް ފަތުރުވެރިން ރާއްޖޭގައި ހޭދަކުރާ ރޭގެ އަދަދު، ފާއިތުވި އަހަރުގެ މި މުއްދަތާ އަޅާބަލާއިރު، 7.2 އިންސައްތައިން ވަނީ ކުރިއަރާފަ އެވެ.

ފިނޭންސް އިން އިތުރަށް ބުނި ގޮތުގައި 2026 އިން 2028 ވަނަ އަހަރަށް ފާސްކޮށްފައިވާ މެދުރާސްތާގެ ބަޖެޓުގައި ރާއްޖޭގެ އިގުތިސާދަށް ނޭދެވޭ އަސަރެއް ނުކުރާނެ ފަދަ މިންވަރަކަށް ސަރުކާރުގެ ޑެފިސިޓް ކުޑަކުރަމުން ގެންދިއުމަށް ވަނީ ނިންމާފަ އެވެ.

ކްރެޑިޓް ރޭޓިންގްސް މިނިސްޓްރީ އޮފް ފިނޭންސް ފިނޭންސް މިނިސްޓަރު މޫސާ ޒަމީރު