ދިވެހިރާއްޖޭގެ ކުނި މެނޭޖުކުރުމުގެ ދާއިރާއަށް ބޮޑު ކުރިއެރުމެއް ގެނައުމުގެ ގޮތުން، ޤައުމީ ކުނި މެނޭޖުކުރުމާ ބެހޭ ޑޭޓާބޭސް، “އުތަހި” ޕްލެޓްފޯމް ރަސްމީކޮށް އިފްތިތާޙުކޮށްފި އެވެ.

މި ޑޭޓާބޭސް އިފްތިތާހުކޮށްދެއްވީ އެންވާރަމެންޓް މިނިސްޓްރީގެ ސްޓޭޓް މިނިސްޓަރ މުޙައްމަދު ޒަހީނެވެ. މި ޑޭޓާބޭސް އިފްތިތާހުކޮށްފައިވަނީ ލ. ގަމުގައި 3 ދުވަހުގެ މުއްދަތަކަށް ކުރިއަށް ގެންދިޔަ މަގޭ ސާފުރާއްޖެ ގައުމީ މަހާސިންތާ 2025 ނިންމުމުގެ ރަސްމިއްޔާތުގެ ތެރެއިންނެވެ.

މި ޑިޖިޓަލް ޕްލެޓްފޯމްގެ މައިގަނޑު މަގުސަދަކީ ކުނި މެނޭޖުކުރުމާ ގުޅޭ ހުރިހާ މަޢުލޫމާތެއް ރިކޯޑުކޮށް، ބަލަހައްޓައި، އަދި ރިޕޯޓުކުރުން ފަހިކޮށްދިނުމެވެ. މިއީ ރާއްޖޭގެ ކުނި މެނޭޖުކުރުމުގެ ނިޒާމު އިތުރަށް ހަރުދަނާކުރުމަށް އެޅުނު މުހިންމު ފިޔަވަޅެކެވެ.

މި ޕްލެޓްފޯމަކީ ކުނި މެނޭޖުކުރުމުގެ މަސައްކަތްތައް ހަރުދަނާކުރުމަށްޓަކައި ތިން ބަޔަކަށް ބަހާލެވިފައިވާ ނިޒާމެކެވެ. އޭގެ ތެރޭގައި އެޑްމިން ޕޯޓަލްއަކާއި، ވޭސްޓް މެނޭޖްމެންޓް ސިސްޓަމަކާއި، އަދި ޢާންމުންނަށް ޚާއްޞަ ސިޓިޒަން އެޕްލިކޭޝަނެއް ހިމެނެ އެވެ. މި ނިޒާމުގެ ސަބަބުން ރާއްޖޭގައި އުފެދޭ ކުންޏާ ބެހޭ މަޢުލޫމާތުތަކާއި ތަފާސްހިސާބުތައް މަރުކަޒީކޮށް އެއް ތަނަކުން ފެންނަން ހުންނާނެ އެވެ. ޖުމްލަ ގޮތެއްގައި ޑޭޓާގެ ސައްހަކަން ކަށަވަރުކޮށް ދިނުމަށް އެހީތެރިވެދެ އެވެ.

އުތަހި ޕްލެޓްފޯމްގައި ވަނީ އޮޕަރޭޝަނަލް ކަންކަން ހަރުދަނާކުރުމަށްޓަކައި ހާއްސަ ފީޗާތަކެއް ހިމަނާފައެވެ. އޭގެ ތެރޭގައި ކުނި އުފުލާ އުޅަނދުތަކުގެ ތަފުސީލުތައް ރިކޯޑުކުރުމުގެ އިތުރުން، އެ އުޅަނދުތައް ދަތުރުކުރާ މަގުތައް ޓްރެކްކުރެވޭނެ ނިޒާމެއް ގާއިމުކުރެވިފައިވެ އެވެ. މިއީ ކުނި ނެގުމުގެ ހިދުމަތްތައް ދެވޭ ގޮތް މޮނިޓަރކޮށް، ހިދުމަތުގެ ފެންވަރު އިތުރަށް ރަނގަޅުކުރުމަށް މަގުފަހިކޮށްދޭނެ ކަމެކެވެ.

އާންމު ރައްޔިތުންނަށް ހާއްސަކޮށްފައިވާ ސިޓިޒަން އެޕްލިކޭޝަންގެ ޒަރިއްޔާއިން، ރައްޔިތުންނަށް ކުނި ނަގާ ތާވަލުތައް ފަސޭހަކަމާއެކު ބަލައިލެވޭނެ އެވެ. މީގެ އިތުރުން، ކުންޏާ ބެހޭ ގޮތުން ދިމާވާ ޝަކުވާތަކާއި މައްސަލަތައް ވަގުތުން ރިޕޯޓުކުރުމުގެ ފުރުޞަތުވެސް މި އެޕްލިކޭޝަނުން ލިބިގެންދާނެ އެވެ.

މަގޭ ސާފުރާއްޖެ - ކުނި މެނޭޖްކުރުމުގެ ޤައުމީ މަޝްރޫޢު 2028-2024 މަގޭ ސާފުރާއްޖެ ޤައުމީ މަހާސިންތާ މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް