އޮޕަރޭޝަން ”އަލިމަގުން“ 29 ކިލޯގެ މަސްތުވާތަކެތި އަތުލައިގަނެވުމަކީ ކާމިޔާބީ އެއް ކަމުގައި ފުލުހުން ބުނެފި އެވެ.
މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ފުލުހުން ބުނެފައިވަނީ، މި އޮޕަރޭޝަން ރޭވިފައިވާ ގޮތަށް އަދިވެސް ކުރިއަށް ދާނެއެވެ. އަދި މި އޮޕަރޭޝަނަކީ ކާމިޔާބު އޮޕަރޭޝަނެއް ކަމަށް ދެކިވަޑައިގަންނަވާ ކަމަށްވެސް ބުނެފައިވެ އެވެ.
”މުޅި ރާއްޖެއަށް ހުރިހާ ސަރަހައްދަކަށް އެއްވަގުތެއްގަ އެއް ލެވެލްގަ ހިންގުނު އޮޕަރޭޝަނެއް، ނޮވެމްބަރު 13 ވަނަ ދުވަހާ ހަމައަށް ހިންގުނު ހިސާބުން ބަލާކަމަށް ވާނަމަ، އަޅުގަނޑު ދަންނަވާނީ ކާމިޔާބު މިންވަރެކޭ 29 ކިލޯ އަކީ.“ ފުލުހުން ބުނެފައިވެ އެވެ.
ކުރިއަށް އޮތް ދުވަސްތަކުގައި ވެސް އޮޕަރޭޝަނަށް ކަލެކްޓް ކުރަންޖެހޭ އިންފޮމޭޝަނާއި އެ ހުރިހާ ކަމަކަށް ބެލުމަށް ފަހު ޕްލޭން ކުރެވިފައިވާ ގޮތަށް ކުރިއަށް ދާނަމަ މަސްތުވާތަކެތީގެ ވިޔަފާރި ކުރާ އަދި ގިނަ އަދަދެއްގެ މަސްތުވާތަކެތި އަތުލައި ގަތުމަށް ފުރުސަތު ބޮޑު ކަމަށް ވެސް ފުލުހުން ބުނެފައިވެ އެވެ.
މި މަހުގެ އެއްވަނަ ދުވަހުން ފެށިގެން 13 ވަނަ ދުވަހާއި ހަމައަށް ކުރިއަށް ގެންދިޔަ މި އޮޕަރޭޝުގައި 110 މީހަކު ހައްޔަރުކޮށްފައިވެ އެވެ. މި އޮޕަރޭޝަނުގައި 500 ފުލުހުން ޑިޕްލޮއިކޮށްފައިވާއިރު މި އޮޕަރޭޝަން 39 ރަށެއްގައި ކުރިއަށް ގެންގޮސްފައިވެ އެވެ.
އޭގެ އިތުރުން މި މި އޮޕަރޭޝަނުގައި 105 ތަނަކާއި ކަނޑު އުޅަނދެއް ބަލާ ފާސްކޮށްފައިވެ އެވެ. އަދި ނުވަ އެއްގަމު އުޅަނދެއް ބަލައިފާސްކޮށްފަައިވެ އެވެ.
