ހަމަލާ ހުއްޓާލުމުގެ އެއްބަސްވުމާ އިޒްރޭލުން ހިލާފުވަމުންދާތީ ހަމާސްއިން މިސްރުގެ ޖާސޫސީ ވެރިޔާއާ ބައްދަލުކޮށްފި އެވެ.
ބޭރުގެ މީޑިއާތަކުން ރިޕޯޓުކޮށްފައިވާގޮތުގައި، ހަމާސްގެ އިސް ޓީމަކުން މިސްރުގެ ޖާސޫސީ ވެރިޔާއާ ބައްދަލުކޮށްފައިވަނީ މިސްރުގެ ވެރިރަށް ކައިރޯގަ އެވެ. އެގޮތުން މި ބައްދަލުވުމުގައި ހަމަލާތައް ހުއްޓާލުމުގެ އެއްބަސްވުމާ ޚިލާފަށް އިޒްރޭލުން ޣައްޒާއަށް ހަމަލާދެމުންދާތީ އެކަމުގެ ކަންބޮޑުވުން ހަމާސްއިން ވަނީ ހިއްސާކޮށްފަ އެވެ.
ހަމާސްއިން ބުނެފައިވަނީ، ހަމަލާތައް ހުއްޓާލުމުގެ އެއްބަސްވުމުގެ ފުރަތަމަ މަރުހަލާއާ އެއްގޮތަށް ހަމާސްއިން އަމަލުކުރަމުންދިޔަ ނަމަވެސް އިޒްރޭލުން ކޮންމެ ދުވަހަކު ކަހަލަ ގޮތަކަށް އެއްބަސްވުމާ ޚިލާފަށް ޣައްޒާއަށް ހަމަލާތައް ދެމުންދާ ކަމަށެވެެ. އަދި އިޒްރޭލުގެ މި ހަމަލާތަކުގައި މިހާތަނަށް 300 އަށްވުރެ ގިނަ މީހުން ޝަހީދުކޮށްލާފައިވާ ކަމަށްވެސް ބުނެފައިވެ އެވެ.
އެއްބަސްވުމާ ޚިލާފަށް އިޒްރޭލުން ޣައްޒާއަށް ދެމުންދާ ހަމަލާތަކުގައި މިއަދުވެސް ޣައްޒާއިން ހަތަރު މީހަކު ޝަހީދުކޮށްލާފައިވެ އެވެ. ޣައްޒާގެ އިތުރުން، ހުޅަނގު އައްސޭރީގައި ދިން ބަޑީގެ ހަމަލާއެއްގައިވެސް ފަލަސްތީނުގެ ރައްޔިތަކު ޝަހީދުކޮށްލާފައިވެ އެވެ. ބޭރު މީޑިއާތަކުން ރިޕޯޓު ކޮށްފައިވާގޮތުގައި، ހުޅަނގު އައްސޭރީގައި ފަލަސްތީނުގެ ރައްޔިތެއްގެ ގަޔަށް ބަޑިޖަހާފައިވަނީ ފަލަސްތީނުގެ ބިންތައް ހިސޯރުކުރަމުންދާ ޔަހޫދީންގެ ބަޔެކެވެ.
2023 އޮކްޓޫބަރު 7 ވަނަ ދުވަހު ދުވަހުން ފެށިގެން އަޒްރޭލުން، ފަލަސްތީނުގެ ނަސްލުނައްތާލުމަށް އިންތިޒާމުވެގެން ހިންގަމުންދާ ޖަރީމާގައި މިހާތަނަށް 69,733 މީހުން ޝަހީދުކޮށްލާފައިވެ އެވެ. މި ހަމަލާތަކުގައި 170,863 މީހުންނަށް އެކިވަރުގެ އަނިޔާތައް ލިބިފައިވެ އެވެ.
