މާލޭގައި ގްރޫޕަކުން ގޮސް ތޫނު އެއްޗެހިން ހަމަލާދީ މަރާލި އަސީލް އަހުމަދުގެ މަރުގެ މައްސަލާގައި ދައުވާލިބުނު މީހުންނަށް ކުށް ސާބިތުނުވެ ސަލާމަތްވި މައްސަލަ އަލުން ބެލުމަށް ހައި ކޯޓުން އަމުރުކޮށްފި އެވެ.

އިސްކަންދަރު ސްކޫލު ކުރިމަތިން އޮންނަ ދިދި ގޯޅި ތެރޭގައި ހުންނަ އަގޯރާ އެކްސްޕްރެސް ފިހާރަ ކައިރީގައި ތޫނު އެއްޗެހިން ހަމަލާދީ 2014 ވަނަ އަހަރު އަސީލް މަރާލި މައްސަލައިގައި ދައުލަތުން ހަ މީހެއްގެ މައްޗަށް ކްރިމިނަލް ކޯޓުގައި ޓެރަރިޒަމްގެ ދައުވާކުރި އެވެ. ނަމަވެސް ކްރިމިނަލް ކޯޓުން ހުކުމްކުރީ އެ މީހުންގެ މައްޗަށް ކުށް ސާބިތުނުވާ ކަމަށެވެ.

ދައުވާކުރި ފަރާތްތައް؛

• ގދ. ތިނަދޫ ސްވީޓްޑްރީމް، އަހުމަދު ނިމްޝާދު.

• ހުޅުމާލޭ 10118، އަހުމަދު ޝިރުހާން ޖައުފަރ.

• ދަފްތަރު ނަމްބަރު 6566، އިސްމާއިލް ރިފާއު.

• ގދ. ވާދޫ އާބަހާރުގެ، އިހްސާން ރަޝީދު.

• މ. ގޯލްޑްބާޑްލިލީ، ހަސަން އިސާމް މުހައްމަދު.

• މއ. ރާޅުއެރިގެ، ޝާރިފް ޝަރީފް.

ކްރިމިނަލް ކޯޓުގެ އެ ހުކުމް ދައުލަތުން އިސްތިއުނާފް ކުރުމުން ހައި ކޯޓުން މިއަދު ކުރި ހުކުމުގައިވަނީ އެ މީހުންގެ މައްޗަށް ކުށް ސާބިތުނުވާ ކަމަށް ހުކުމް ކުރުމުގައި ހެކި ލިބިފައިނުވާ ކަމަށް ކްރިމިނަލް ކޯޓުގެ ހުކުމުގައި އޮތަސް، އެގޮތަށް ނިންމި ސަބަބެއް އެ ނިންމުމުގައި ފާހަގަކޮށްފައިނުވާ ކަމަށެވެ. އެހެންކަމުން އެ މައްސަލަ ދަށު ކޯޓުން ނިންމުމުގައި ދައުލަތުން ހުށަހެޅި ހެކިތަކަށް ރިއާޔަތް ކޮށްފައިވާ ކަމަށް ނުބެލެވޭ ކަމަށް ހައިކޯޓުގެ ހުކުމްގައިވެ އެވެ. އެހެންވެ އިސްތިއުނާފެގެ އެ މައްސަލައިގަ ހައިކޯޓަށް ހެކިތަކަށް ރިއާޔަތްކޮށް، ވަޒަން ނުކުރެވޭނެކަން ފާހަގަކޮށް، ހުކުމްކުރީ ދަށުްނ ކޯޓުން އަލުން މައްސަލަ ބެލުމަށެވެ.

ހައި ކޯޓުގައި މައްސަލަ ބެއްލެވި ފަނޑިޔާރުންނަކީ؛

• ފަނޑިޔާރު މުހައްމަދު ޝަނީޒް އަބްދުﷲ

• ފަނޑިޔާރު މުހައްމަދު ފައިސަލް

• ފަނޑިޔާރު ހަސަން ޝަފީއު

މި ހަ މީހުންގެ އިތުރުން މި މައްސަލާގަ ދެ ކުޑަކުއްޖެއްގެ މައްޗަށްވެސް ދައުލަތުން ދައުވާކުރި އެވެ. އެ ޝަރީއަތްތައް ކުރިއަށްގެންގޮސްފައިވަނީ ޖުވެނިއަލް ކޯޓުގަ އެވެ. އެ ކޯޓުން އެ މައްސަލައިގަ ހުކުމްކޮށްފައިވަނީ މައްސަލަ އެ ކުދިންގެ މައްޗަށް ސާބިތުވާކަމަށެވެ. އަދި ހައިކޯޓުންވެސް ވަނީ ޖުވެނިއަލް ކޯޓުގެ އެ ހުުކުމް ދަމަހައްޓާފަ އެވެ.

ހައި ކޯޓު ކްރިމިނަލް ކޯޓު