އިސްރާއީލުން ޣައްޒާއަށް ދިން ވައިގެ ހަމަލާތަކުގައި 33 މީހުން ޝަހީދުވެ، އެތައް ބަޔަކު ޒަޚަމްވި ހާދިސާ ދިވެހި ސަރުކާރުން ހަރުކަށި އިބާރާތުން ކުށްވެރިކޮށް، ހަނގުރާމަ ހުއްޓާލުމުގެ އެއްބަސްވުމަށް ފުރިހަމައަށް ތަބާވުމަށް ގޮވާލައިފި އެވެ.
މި ހަމަލާތައް އަމާޒުކޮށްފައިވަނީ ޣައްޒާގެ ދެކުނުގެ ޚާން ޔޫނުސް އަދި ޣައްޒާ ސިޓީގައި ހާލުގައި ޖެހިފައިވާ މީހުންނަށް ހިޔާވަހިކަން ދީފައިވާ އިމާރާތްތަކަށާއި ވަގުތީ ހިޔާވަހިކަން ހޯދާފައިވާ ތަންތަނަށެވެ.
މި ހަމަލާތަކުގައި ޝަހީދުވި މީހުންގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނެ އެވެ. ޚާން ޔޫނުސްގެ ނާސިރު ހޮސްޕިޓަލުން ބުނި ގޮތުގައި، ހަތަރު ވައިގެ ހަމަލާގެ ސަބަބުން 17 މީހެއްގެ ހަށިގަނޑު ލިބިފައިވާ ކަމަށާއި، އޭގެ ތެރޭގައި ފަސް އަންހެނުންނާއި ފަސް ކުޑަކުދިން ހިމެނެ އެވެ. އަދި ޣައްޒާ ސިޓީގައި ދިން ދެ ހަމަލާގައި 16 މީހުން ޝަހީދުވިއިރު، އޭގެ ތެރޭގައި ހަތް ކުޑަކުދިންނާއި ތިން އަންހެނުން ހިމެނެ އެވެ. ޖުމްލަ 33 މީހުން މި ހަމަލާތަކުގައި ޝަހީދުވެފައިވެ އެވެ.
ރާއްޖޭގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އިސްރާއީލުން ދިން މި ހަމަލާތަކަކީ ހަނގުރާމަ ހުއްޓާލުމުގެ އެއްބަސްވުމާ ހިލާފު ޢަމަލުތަކެއް ކަމަށެވެ. އަދި އިސްރާއީލުން އަސްކަރީ އޮޕަރޭޝަންތައް ކުރިއަށް ގެންދިއުމުގެ ސަބަބުން ފަލަސްތީނުގެ ރައްޔިތުންނަށް އަމިއްލަ ގެދޮރު ދޫކޮށް ދިޔުމަށް މަޖުބޫރުވުމުގެ ބިރު އެބައޮތް ކަމަށް ރާއްޖެއިން ބުނެފައިވެ އެވެ.
އޭގެއިތުރުން ހަނގުރާމަ ހުއްޓާލުމަށް ވެފައިވާ އެއްބަސްވުންތަކަށް ފުރިހަމައަށް ތަބާވުމަށާއި، އާންމުން ހިމާޔަތް ކުރުމަށާއި، ސަރަހައްދުގައި ހަމަނުޖެހުން އިތުރަށް ގޯސްވިޔަ ނުދިނުމަށް، ބައިނަލްއަޤްވާމީ މުޖްތަމަޢަށް ދިވެހި ސަރުކާރުން ވަނީ ގޮވާލާފަ އެވެ. މީގެ އިތުރުން، އިސްރާއީލުން ފަލަސްޠީނުގައި ހިންގަމުންދާ ލާއިންސާނީ ޖަރީމާތައް ހުއްޓުވުމަށް އަވަސް ފިޔަވަޅުތަކެއް އެޅުމަށްވެސް ރާއްޖެއިން ގޮވާލާފައިވެ އެވެ.
ފޮރިން މިނިސްޓްރީން ވަނީ ފަލަސްޠީނުގެ ރައްޔިތުންގެ ޙައްޤުގައި ދެމިއޮތުމުގެ މުހިންމުކަން ހާމަކޮށްފަ އެވެ. އެގޮތުން ފޮރިން މިނިސްޓްރީން ބުުނީ ރާއްޖެއިން އަބަދުވެސް ތާއީދުކުރާނީ 1967 ވަނަ އަހަރުގެ ކުރިން ކަނޑައަޅާފައިވާ ސަރަޙައްދުގެ މައްޗަށް ބިނާކޮށް، އިރުމަތީ ގުދުސް ވެރިރަށެއްގެ ގޮތުގައިވާ ފަލަސްޠީނުގެ މިނިވަން ދައުލަތެއް ޤާއިމުކުރުމަށެވެ.
މި ހަމަލާތަކާ ގުޅިގެން އިސްރާއީލުން ބުނެފައިވަނީ، އެ ހަމަލާތައް ދިނީ ބުދަ ދުވަހު ޚާން ޔޫނުސްގައި އެމީހުންގެ ސިފައިންނަށް ހަމަލާދިނުމާ ގުޅިގެން ކަމަށާއި، ނަމަވެސް އެމީހުންނަށް އެއްވެސް ގެއްލުމެއް ލިބިފައިނުވާ ކަމަށެވެ. ހަމާސް ޖަމާއަތުން ވަނީ އިސްރާއީލުގެ މި ހަމަލާތަކަކީ ”ގަތުލުއާންމެއް“ ކަމަށް ސިފަކޮށް، އިސްރާއީލުގެ ސިފައިންނާ ދިމާލަށް އެއްވެސް ހަމަލާއެއް ނުދޭ ކަމަށް ބުނެފަ އެވެ.
ޣައްޒާގެ ރައްޔިތުން ބުނަމުންދަނީ، ހަނގުރާމަ ހުއްޓާލި ނަމަވެސް، ދެ އަހަރުގެ ހަނގުރާމަ ހުއްޓާނުލާ ކުރިއަށްދާ ކަހަލަ އިހުސާސެއް ކުރެވޭ ކަމަށެވެ. ހަނގުރާމަ ހުއްޓާލުމަށްފަހު އިސްރާއީލުން ދިން ހަމަލާތަކުގައި 300 އަށްވުރެ ގިނަ މީހުން ޝަހީދުވެފައިވާ ކަމަށް އެ ސަރަހައްދުގެ އޮފިޝަލުން ބުނެ އެވެ.
