ތައިލެންޑްގެ ބެންކޮކްގައި މީހަކު ބަޑިޖަހައި 5 މީހުން މަރާލައިފި އެވެ.
ބަޑިޖެހުމުގެ މި ހާދިސާ ހިނގާފައިވަނީ ބޮންކޮކްގެ މީހުންގިނަ ބާޒާރެއްގަ އެވެ. ތައިލެންޑްގެ ފުލުހުންނާ ހަވާލާދީ ބޭރު މީޑިއާތަކުން ބުނެފައިވަނީ، މި ހާދިސާގައި 5 މީހަކު މަރުވެފައިވާ ކަމަށާއި އަދި އެކަކު ޒަހަމު ވެފައިވާ ކަމަށެވެ.
މަރުވި 5 މީހުންނަކީވެސް އެތަނުގައި ސެކިއުރިޓީ ގާޑުންގެ ގޮތުގައި މަސައްކަތްކުރި މީހުން ކަމަށް މީޑިއާތަކުން ރިޕޯޓުކޮށްފައިވެ އެވެ. އަދި ހަމަލާދިން މީހާ އަމިއްލައަށް މަރުވެފައިވާ ކަމަށްވެސް ތައިލެންޑްގެ ފުލުހުންނާ ހަވާލާދީ ބޭރު މީޑިއާތަކުން ރިޕޯޓުކޮށްފައިވެ އެވެ.
ތައިލެންޑްގެ ފުލުހުންނާ ހަވާލާދީ ރިޕޯޓުކޮށްފައިވާގޮތުގައި ފުލުހުން އަންނަނީ ހަމަލާދިން މީހާއާ މިހާރު ތައިލެންޑް ކެމްބޯޑިއާ ބޯޑަރުގައި ހިނގަމުންދާ ހަމަނުޖެހުމާ އެއްވެސް ގުޅުމެއް އޮތްތޯ ބެލުމުގެ މަސައްކަތް ކުރަމުންނެވެ. އަދި އޭނާ މި ހަމަލާދިން ސަބަބެއް ހޯދުމަށްވެސް އަންނަނީ މަސައްކަތް ކުރަމުންނެވެ.
