ރާއްޖެޓީވީގެ ޕްރޮގްރާމެއްގައި އޯޓިސްޓިކް ކުދިންނާއި ޑައުންސިންޑްރަމް ހުންނަ ކުދިންނާއި ގުޅުވައި، ރައީސް ޑރ. މުހައްމަދު މުއިއްޒުއަށް ނިސްބަތްކޮށް ދެއްކި ވާހަކަތައް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ކުށްވެރިކޮށްފި އެވެ.
ރާއްޖޭޓީވީގެ ޕްރޮގްރާމެއްގައި ދެއްކި ވާހަކަތަކާ ގުޅިގެން އެޗްއާރްސީއެމްއިން މިރޭ ބުނެފައިވަނީ، ރާއްޖެ ޓީވީގެ ”ކާލާ ބައިސާ“ ޕްރޮގްރާމްގައި ނުކުޅެދުންތެރިކަން ހުންނަ ފަރާތްތަކަށް ކުޑައިމީސްކޮށް ނުކުޅެދުންތެރިކަން ހުންނަ ފަރާތްތަކަކީ ދަށް ބައެއްގެ ގޮތަށް އަދި މަލާމާތް ރައްދުވާ މޭރުމަކުން ވާހަކަދައްކާފައިވާތީ އެކަން ކުށްވެރިކުރާ ކަމަށެވެ.
އެޗްއާރްސީއެމްއިން ބުނެފައިވަނީ މުޖުތަމައުގެ އެހެންމީހުންނެކޭ އެއްގޮތަށް ނުކުޅެދުންތެރިކަން ހުންނަ ފަރާތްތަކަށްވެސް އިންސާނީ ހައްޤުތައް އެއްހަމައެއްގައި ލިބިދީފައިވާ ކަމަށެވެ. އަދި ކޮންމެ މީހަކަށްވެސް އަބުރުވެރިކަމާ ކަރާމާތްތެރިކަމާއެކު ދިރިއުޅުމުގެ ހައްޤު ލިބިދީފައިވާ ކަމަށެވެ.
މީގެއިތުރުން އެޗްއާރްސީއެމުން ވަނީ މި މައްސަލަ ބެލުމަށް ކަމާބެހޭ ފަރާތްތަކަށްވެސް ގޮވާލައްވާފަ އެވެ.
”އެހެންކަމުން، މިފަދަ އަމަލުތައް ނުކުރުމަށާއި އަދި މީޑިއާތަކުން ގެނެސްދޭ މަންޒަރާއި އަޑު އަދި މައުލޫމާތު ގެނެސްދިނުމުގައި މުޖުތަމައުގެ އެއްވެސް ފަރުދެއްގެ އިންސާނީ ހަައްޤާއި އިންސާނީ ކަރާމާތަށް އުނިކަން ނާންނާނެފަދަ ގޮތަކަށް ގެނެސްދިނުމަށް ސަމާލުކަން ދިނުމަށް ކޮމިޝަނުން ހުރިހާ މީޑިއާތަކަށް އިލްތިމާސްކުރަމެވެ. އަދި މިފަދަ މައްސަލަތައް ބެލުމަށް ކަމާގުޅުންހުރި އިދާރާތަކަށް ގޮވާލަމެވެ.“ އެޗްއާރްސީއެމްއިން ބުނެފައިވެ އެވެ.
ރާއްޖޭޓީވީގެ ޕްރޮގްރާމެއްގައި މިފަދަ ވާހަކަތަކެއް ދައްކާފައިވަނީ، ކުރީގެ ކާނަލް އަހްމަދު ފަޔާޒު އަލީ (ޕާޕާ) އަދި ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު އަބްދުﷲ (މޮސްޓާ) އެވެ. މި ވާހަކަތަކަށް ގިނަބައެއްގެ ފާޑުކިޔުންވަނީ އަމާޒުވެފަ އެވެ.
ބްރޯޑްކާސްޓިން ކޮމިޝަނުން ވެސް ވަނީ މިމައްސަލަ ބަލާނެކަން ހާމަކޮށްފަ އެވެ.
