ކުރިއަށް އޮތް ހަތަރު އަހަރުގެ ތެރޭގައި ގައުމީ އުފެއްދުންތެރިކަމުގެ ނިސްބަތުން ޖުމްލަ ދަރަނި 90 އިންސައްތަ ކުޑަ ކުރެވޭނެކަމަށް ފިނޭންސް މިނިސްޓްރީން ބުނެފި އެވެ.
ފިޗް އިން ރާއްޖޭގެ ކްރެޑިޓް ރޭޓިން ދަށް ކުރުމުން ފިނޭންސް މިނިސްޓްރީން ނެރުނު ނޫސް ބަޔާނެއްގައި ބުނެފައިވަނީ ފިސްކަލް ދެމެހެއްޓެނިވިކަން ކަށަވަރު ކުރުމުގެ ގޮތުން ދައުލަތުގެ ހަރަދުތައް ކޮންޓްރޯލް ކުރުމުގެ ސިޔާސަތުތަކެއް އެކުލަވާ ތަންފީޒް ކުރުމަށް ތައްޔާރުވަމުންދާ ކަމަށެވެ.
ދުނިޔޭގެ ކްރެޑިޓް ރޭޓިން ފާމް “ފިޗް ރޭޓިންގްސް” (ފިޗް) އިން ދިވެހިރާއްޖެއަށް ދީފައިވާ ރޭޓިންގ “ސީސީސީ ޕްލަސް” އިން “ސީސީ” އަށް ދަށްކޮށްފައި ވަނީ މިއަދު އެވެ.
ފިނޭންސް މިނިސްޓްރީން ބުނީ ސަރުކާރު ހިއްސާވާ ކުންފުނިތަކުގެ އިސްރާފްތައް ކުޑަކޮށް އެފިޝިއެންޓް ކުރުމާއި އިންޑިރެކްޓް ސަބްސިޑީތަކުގެ ބަދަލުގައި ދައުލަތުގެ އެހީތެރިކަމަށް އެންމެ ބޭނުން ޖެހޭ ފަރާތްތަކަށް ޓާގެޓްކޮށް ދެވޭ ޑައިރެކްޓް ސަބްސިޑީއަކަށް ބަދަލު ކުރުމާއި ސިއްހީ އިންޝުއަރެންސްގެ ނިޒާމު ހަރުދަނާ ކުރުމާއި ދުނިޔޭގެ ބާޒާރުގައި ތެލުގެ އަގަށް އަންނަ ކުއްލި ބަދަލުތަކުން ރައްކާތެރިވުމުގެ ގޮތުން ފިއުލް ހެޖިންއާ ބެހޭ ސިޔާސަތުތައް ތަންފީޒު ކުރުމާއި ސަރުކާރުގެ ޑިސްކްރެޝަނަރީ ހަރަދުތައް ކުޑަ ކުރުމަށް ރާވާފައިވާ ކަމަށެވެ. މިއަހަރުގެ ތެރޭގައި މިފްކޯއަށް މަހުގެ އަގު ހިފެހެއްޓުމަށްޓަކައި ދެމުންދާ ސަބްސިޑީ މުރާޖާ ކޮށްފައިވާކަން މިނިސްޓްރީން ވަނީ ފާހަގަކޮށްފަ އެވެ. އަދި ބަލްކް ޕްރޮކިއުމެންޓް ނިޒާމު މެދުވެރިކޮށް ފެންވަރު ރަނގަޅު ބޭސް ރާއްޖެ އެތެރެކުރަން ފަށާފައިވާކަންވެސް މިނިސްޓްރީން ފާހަގަކޮށްފައިވެ އެވެ.
ފިސްކަލް ސިޔާސަތުތަކަށް ގެނެވޭ ބަދަލުތަކަކީ ދައުލަތުން ދަރަނި ނަގަން ޖެހޭ މިންވަރު ކުޑަކޮށް ފިސްކަލް އަދި އެކްސްޓާނަލް ސެކްޓާގެ ހާލަތު ރަނގަޅު ކުރުމުގެ މަގުސަދުގައި އެކުލަވާލާ ތަންފީޒު ކުރުމަށް ރާވާފައިވާ ބަދަލުތަކެއް ކަމަށް ފިނޭންސް މިނިސްޓްރީ ބުނެ އެވެ. އަދި ރާއްޖެއަށް ދިމާވެފައިވާ ބޭރު ފައިސާގެ ދަތިތަކަށް އެކަށީގެންވާ ހައްލެއް ހޯދުމުގެ ގޮތުން އެކުވެރި ދައުލަތްތަކާއި ބައިނަލްއަގުވާމީ މާލީ އިދާރާތަކާއެކު މަސައްކަތް ކުރަމުންދާކަމަށްވެސް ބުނެފައިވެ އެވެ.
މި ސިޔާސަތުތައް ތަންފީޒުވެ، މި އަހަރާއި މެދުރާސްތާގައި ފަތުރުވެރިކަމުގެ ދާއިރާއަށާއި އިގްތިސޯދަށް އަންނާނެކަމަށް ބެލެވޭ ކުރިއެރުމާއެކު، ދައުލަތުގެ ފިސްކަލް އަދި ދަރަނީގެ ދެމެހެއްޓެނިވިކަން އިއާދަ ކުރެވޭނެކަމަށް ފިނޭންސް މިނިސްޓްރީން ވަނީ ބުނެފަ އެވެ. އެގޮތުން 2028 ވަނަ އަހަރުގެ ނިޔަލަށް ގައުމީ އުފެއްދުންތެރިކަމުގެ ނިސްބަތުން ޖުމްލަ ދަރަނި 90 އިންސައްތައަށްވުރެ ކުޑަ ކުރެވޭނެ ކަމަށާއި މުސްތަގުބަލުގައި ރާއްޖޭގެ ކްރެޑިޓް ރޭޓިންއަށް ހެޔޮ ބަދަލުތަކެއް އަންނާނެކަމަށް ބެލެވޭކަމަށް މިނިސްޓްރީން ބުނެ އެވެ.
