މާލެއާ ވިލިމާލެއާ ދެމެދު އަޅާ ތިލަމާލެ ބްރިޖުގެ 40 އިންސައްތަ މަސައްކަތް ނިމިއްޖެ އެވެ.
ކޮންސްޓްރަކްޝަން މިނިސްޓްރީގެ ސްޓޭޓް މިނިސްޓަރު އިބްރާހިމް ތޮއާމް މުހައްމަދު އެކްސްގައި ކުރެއްވި ޕޯސްޓެއްގައި ވިދާޅުވީ ތިލަމާލެ ބްރިޖުގެ 40.47 އިންސައްތަ ނިމިފައިވާ ކަމަށެވެ. އަދި މިދިޔަ އަހަރު ނޮވެމްބަރު މަހު ނިމިފައި އޮތީ 29 އިންސައްތަކަން އޭނާ ފާހަގަ ކުރެއްވި އެވެ.
ތިލަމާލެ ބްރިޖުގެ އެއް ތަނބު އަނެއް ތަނބާ ގުޅުވާލުމަށް ހަމަޖެހިފައިވަނީ ޕްރީ-ކާސްޓް ޑެކް ސެގްމެންޓަކުންނެވެ. ތޮއާމް ވިދާޅުވީ ވިލިމާލެއާ ދިމާލުން މިހާރު މި ސެގްމެންޓުތައް ގުޅުވާލުމުގެ މަސައްކަތް މިއަދު ފަށާފައިވާ ކަމަށެވެ.
ތިލަމާލެ ބްރިޖަކީ އިންޑިއާއިން ދީފައިވާ 100 މިލިއަން ޑޮލަރުގެ ހިލޭ އެހީ އާއި އެގައުމުން ދީފައިވާ 400 މިލިއަން ޑޮލަރުގެ ލޯނު ފައިސާއިން އަޅާ ބްރިޖެކެވެ. މި މަޝްރޫ ކުރިއަށް ގެންދަނީ އިންޑިއާގެ އެފްކޮންސް ކުންފުންޏާ ހަވާޅުކޮށްގެންނެވެ.
ބްރިޖާއި ކޯޒްވޭ ހިމެނޭ ގޮތަށް ހަދަން ނިންމާފައިވާ ތިލަމާލެ ބްރިޖަކީ ގާތްގަނޑަކަށް 6.695 ކިލޯ މީޓަރު ދިގު ބްރިޖެކެވެ.
ރާއްޖެ - އިންޑިއާ މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ތިލަމާލެ ބްރިޖް
